କୃଷିର ଉନ୍ନତିରେ ଦେଶର ଉନ୍ନତି, ଏହା ଉପଲବ୍ଧିି କରିଛନ୍ତି ନାସାର ପୂର୍ବତନ ବୈଜ୍ଞାନିକ ଡ. ପରାଗ ନର୍ଭେକର। ଆମେରିକାର ମହାକାଶ ଗବେଷଣା ସଂସ୍ଥା ନାସାରେ ୧୨ ବର୍ଷ କାର୍ଯ୍ୟ କରିବା ପରେ ଚାକିରି ଛାଡ଼ି ମହାରାଷ୍ଟ୍ରରେ କୃଷି ଓ କୃଷକଙ୍କ ବିକାଶରେ ଲାଗିଛନ୍ତି। ସେ ୨୦୧୭ରେ ପ୍ରଯୁକ୍ତଭିତ୍ତିକ ଷ୍ଟାର୍ଟଅପ୍ ‘ସେନ୍ସାର୍ଟିକ୍ସ’ ଗଠନ କରି ଏହି ଅଭିଯାନ ଚଳାଇଛନ୍ତି। କୃଷିରେ କ୍ଷତି ଦୂର କରିବା ପାଇଁ ସେ ରୋଗ ଓ ବର୍ଷା ସମ୍ପର୍କରେ ଆଗୁଆ ସୂଚନା ପ୍ରଦାନ କରୁଛନ୍ତି। ୨୦୦୩ରେ ଆଇଆଇଟି ମୁମ୍ବାଇରୁ ଇମେଜ ପ୍ରୋସେସିଂ ଟେକ୍ନୋଲୋଜିରେ ସ୍ନାତକୋତ୍ତର ଡିଗ୍ରୀ ହାସଲ କରିବା ପରେ ନାସାରେ ଯୋଗ ଦେଇଥିଲେ। ୨୦୧୬ରେ ସେ ସେଠାରୁ ଫେରିଆସି କମ୍ ଖର୍ଚ୍ଚରେ ଓ୍ବେଦର ଷ୍ଟେଶନ ନିର୍ମାଣ କରି ତା ମାଧ୍ୟମରେ କୃଷକମାନଙ୍କୁ ତଥ୍ୟ ଯୋଗାଉଛନ୍ତି। ଏହି ଷ୍ଟେଶନ ୫ କି.ମି. ବ୍ୟାସାର୍ଦ୍ଧ ମଧ୍ୟରେ ସୂଚନା ଠିକ୍ ଭାବେ ଦେଇପାରୁଛି। ସ୍ମାର୍ଟ ଫୋନ୍ରେ ଜଳ ପରିଚାଳନା, ଶୀତ ଲହର, ପୋଷକତତ୍ତ୍ୱ ପରିଚାଳନା, ପବନର ଦିଗ, ଆଲୋକ ବିଶ୍ଳେଷଣ ସମ୍ପର୍କିତ ଆଗୁଆ ସୂଚନା କୃଷକଙ୍କୁ ଆପ୍ ମାଧ୍ୟମରେ ସୂଚନା ଦିଆଯାଉଛି। ଭାରତର ପ୍ରମୁଖ ଗବେଷଣା ସଂସ୍ଥାଗୁଡ଼ିକ ସହଯୋଗରେ ସେ ଏହାକୁ ପରିଚାଳନା କରୁଛନ୍ତି।
ଏହା ବ୍ୟତୀତ ତୃଣମୂଳସ୍ତରରେ କୃଷକଙ୍କ ପାଇଁ କାର୍ଯ୍ୟ କରୁଥିବା ଶହ୍ୟାଦ୍ରି ଫାର୍ମର୍ସ କମ୍ପାନୀ ସହଭାଗିତାରେ ଏହାକୁ ବ୍ୟାପକ କରିପାରିଛନ୍ତି।