କୃଷ୍ଣ ମୁରାରୀ ଯାଦବ ସୂଚନା ଅଧିକାର ଆଇନ (ଆର୍ଟିଆଇ) ବଳରେ ଲୋକମାନଙ୍କୁ ତଥ୍ୟ ହାସଲ କରିବାରେ ଯେଭଳି ସାହାଯ୍ୟ କରୁଛନ୍ତି ତାହା ସମ୍ପୂର୍ଣ୍ଣ ଭିନ୍ନ। ଏଥିପାଇଁ ସେ ଉତ୍ତରପ୍ରଦେଶର କାନପୁରର ଆଖପାଖ କେତେକ ଗାଁରେ ଚା’ଦୋକାନରେ ଆର୍ଟିଆଇ୍ ଚା ଷ୍ଟଲ୍ ଚଳାଉଛନ୍ତି । ସେ ୨୦୧୩ରୁ ଏଭଳି ଷ୍ଟଲ୍ ଆରମ୍ଭ କରି ଲୋକମାନଙ୍କୁ ଆର୍ଟିଆଇ ସମ୍ପର୍କରେ ସଚେତନ କରିବା ସହ ଏହା ଫାଇଲ୍ କରିବାରେ ସାହାଯ୍ୟ କରୁଛନ୍ତି। ପ୍ରଥମେ ଚୌବେପୁର ଗାଁରେ ଥିବା ଏକ ଚା’ ଷ୍ଟଲ୍ରୁ କୃଷ୍ଣ ଅଭିଯାନ ଆରମ୍ଭ କରିଥିଲେ ଓ ବର୍ତ୍ତମାନ ଆଉ ୪ଟି ଗାଁରେ ଏଭଳି ଷ୍ଟଲ୍ ଖୋଲିସାରିଲେଣି। ୩୬ ବର୍ଷୀୟ କେଏମ୍ ଏବେ ସୁଦ୍ଧା ୫,୦୦୦ରୁ ଊର୍ଦ୍ଧ୍ୱ ଲୋକଙ୍କୁ ସାହାଯ୍ୟ କରି ସାରିଲେଣି। ଏଥିପାଇଁ ଲୋକମାନେ ତାଙ୍କୁ ଶ୍ରଦ୍ଧାରେ କେଏମ୍ ଭାଇ ବୋଲି ସମ୍ବୋଧନ କରୁଛନ୍ତି। ଆରମ୍ଭରୁ ସେ ଗାଁରୁ ଗାଁକୁ ଚାଲିଚାଲି ଯାଇ ଆରଟିଆଇ ସମ୍ପର୍କରେ ଲୋକଙ୍କୁ ସଚେତନ କରିଥିଲେ। କିନ୍ତୁ ଏଥିରେ ଲୋକଙ୍କ ପ୍ରତିକ୍ରିୟା ଭଲ ନ ମିଳିବାରୁ ସେ ଏଭଳି ଷ୍ଟଲ୍ ଆରମ୍ଭ କରିବାକୁ ନିଷ୍ପତ୍ତି ନେଇଥିଲେ। ଷ୍ଟଲ୍କୁ ଯେ କେହି ଆସି ଚା’ ପିଇବା ସହ ଆର୍ଟିଆଇ ସମ୍ପର୍କରେ ସୂଚନା ପାଇପାରୁଛନ୍ତି। କାନପୁର ବାହାରୁ ବି ଲୋକମାନେ ତାଙ୍କ ସହାୟତା ପାଇବା ପାଇଁ ଆସୁଛନ୍ତି। ବିଭିନ୍ନ ସ୍ଥାନରେ ଆର୍ଟିଆଇ ସମ୍ପର୍କରେ ସହଯୋଗ କରିବା ଲାଗି କେଏମ୍ ମଧ୍ୟ ୧୦୦୦ ଯୁବକଙ୍କୁ ପ୍ରଶିକ୍ଷଣ ମଧ୍ୟ ଦେଇ ସାରିଲେଣି। ଉକ୍ତ ଅଭିଯାନ ପାଇଁ ତାଙ୍କୁ ବହୁବାର ଆକ୍ରମଣର ଶିକାର ହେବାକୁ ପଡ଼ିଛି, ହେଲେ ସେ ପଛକୁ ହଟି ନାହାନ୍ତି।