ମାଟିମୂର୍ତ୍ତି ବିସର୍ଜନ ଯୋଗୁ ବର୍ଦ୍ଧିତ ଜଳ ପ୍ରଦୂଷଣ ରୋକିବା ଲାଗି ନାସିକ୍ର ତୃପ୍ତି ଗାଏକ୍ୱାଡ୍ଙ୍କ ଅଭିଯାନ ପ୍ରଶଂସନୀୟ। ୩୩ ବର୍ଷୀୟା ତୃପ୍ତି ଗତ ଦୁଇ ବର୍ଷ ହେବ ଭଙ୍ଗା ତଥା ବିସର୍ଜନ ହେବାକୁ ଥିତ୍ବା ମୂର୍ତ୍ତିଗୁଡ଼ିକୁ ପାଣିରେ ପକାଇବା ପୂର୍ବରୁ ଅଟକାଉଛନ୍ତି ଓ ସେଥିରୁ ଗରିବ ପିଲାମାନଙ୍କ ପାଇଁ ଖେଳନା ତିଆରି କରୁଛନ୍ତି। ସେ ଏବେ ସୁଦ୍ଧା ୧୦ ହଜାର ମୂର୍ତ୍ତିକୁ ପାଣିକୁ ଯିବା ପୂର୍ବରୁ ଅଟକାଇବାରେ ସକ୍ଷମ ହୋଇଛନ୍ତି। ଏହି କାର୍ଯ୍ୟ ସେ ‘ସମ୍ପୂର୍ଣ୍ଣମ୍’ ସଂସ୍ଥା ମାଧ୍ୟମରେ କରୁଛନ୍ତି। ତୃପ୍ତି ପେସାରେ ଜଣେ ଓକିଲ। ୨୦୧୯ରେ ସେ ପ୍ରଥମେ ଉକ୍ତ ଅଭିଯାନ ଆରମ୍ଭ କରିଥିଲେ। ଜଳ ପ୍ରଦୂଷଣର ଭୟାଭୟତା ସମ୍ପର୍କରେ ଲୋକମାନଙ୍କୁ ଅବଗତ କରିବା ପରେ ସେମାନେ ମୂର୍ତ୍ତି ବିସର୍ଜନରୁ ବିରତ ହୋଇ ତାହାକୁ ତୃପ୍ତିଙ୍କୁ ଦେଉଛନ୍ତି। କେବଳ ସତିକି ନୁହେଁ, ଘରେ ଭାଙ୍ଗି ଯାଉଥିବା ମୂର୍ତ୍ତି ବା ଫଟୋକୁ ବାହାରେ କିମ୍ବା ପାଣିରେ ନ ପକାଇବା ଲାଗି ସୋସିଆଲ ମିଡିଆରେ ଅନୁରୋଧ କରିବା ସହ ସେଗୁଡ଼ିକୁ ସଂଗ୍ରହ କରୁଛନ୍ତି। ମେଶିନ୍ ମାଧ୍ୟମରେ ମୂର୍ତ୍ତିରୁୁ ପ୍ଲାଷ୍ଟର ଅଫ୍ ପ୍ୟାରିସ୍କୁ ଅଲଗା କରିବା ପରେ ସେଥିରେ ଖେଳନା ପ୍ରସ୍ତୁତ କରି ଗରିବ ପିଲାମାନଙ୍କୁ ବାଣ୍ଟୁଛନ୍ତି। ଏହା ବ୍ୟତୀତ ପକ୍ଷୀମାନଙ୍କୁ ଖାଦ୍ୟ ଓ ପାଣି ଦେବା ଲାଗି ଛୋଟ ଛୋଟ ପାତ୍ର ମଧ୍ୟ ତିଆରି କରୁଛନ୍ତି। କେବଳ ନାସିକ ନୁହେଁ, ମୂର୍ତ୍ତି ସଂଗ୍ରହ କରିବା ପାଇଁ ସେ ପୁଣେ, ନାଗପୁର ଓ ମୁମ୍ବାଇରେ କେନ୍ଦ୍ର ସ୍ଥାପନ କରିଛନ୍ତି। ଏହା ସହ ମୂର୍ତ୍ତିଗୁଡ଼ିକୁ ପୁଣି ଗଢ଼ିବାର ବ୍ୟବସ୍ଥା କରୁଛନ୍ତି। ଏଥିପାଇଁ ପ୍ରତି ମୂର୍ତ୍ତିକୁ ୫୦ ଟଙ୍କା ନେଉଛନ୍ତି। ଏ ବାବଦରେ ତୃପ୍ତି ୨୦୦୦ ଲୋକଙ୍କୁ ସାହାଯ୍ୟ କରିସାରିଲେଣି।