ଶିଳ୍ପ ବିପ୍ଳବ, ସବୁଜ ବିପ୍ଳବ କଥା ଜାଣିଛନ୍ତି, କିନ୍ତୁ ହଳଦୀ ବିପ୍ଳବ ବିଷୟରେ କେବେ ଶୁଣିଛନ୍ତି କି? ଏମିତି ବିପ୍ଳବ ଆଣିଛନ୍ତି ରାଜସ୍ଥାନର ଦମ୍ପତି ରାମିଲା ଓ ଦେବୀଲାଲ ବ୍ୟାସ। ଏମାନେ ମରୁଡ଼ିପ୍ରବଣ ଡୁଙ୍ଗରପୁର ଜିଲାରେ ହଳଦୀ ଚାଷ ମାଧ୍ୟମରେ ୧୦୨ ଗାଁରେ ଲୋକମାନଙ୍କ ରୋଜଗାର ବଢ଼ାଇ ପାରିଛନ୍ତି। କେବଳ ଏତିକି ନୁହେଁ, ବ୍ୟାସ ଦମ୍ପତି ଡୁଙ୍ଗରପୁର ଜିଲାକୁ ଶିଶୁଶ୍ରମିକ ମୁକ୍ତ କରିବା ସହ କୃଷକ ଆତ୍ମହତ୍ୟା ରୋକିପାରିଛନ୍ତି। କପାଚାଷର କ୍ଷତି ଏଡ଼ାଇବା ପାଇଁ ଏମାନେ ଏହି ଅଭିଯାନ ଚଳାଇ ଏବେ ସୁଦ୍ଧା ହଳଦୀ ଚାଷରେ ୨,୫୦୦ କୃଷକଙ୍କୁ ଯୋଡ଼ି ପାରିଛନ୍ତି। କୃଷକମାନେ ପୂର୍ବାପେକ୍ଷା ଯଥେଷ୍ଟ ବେଶି ରୋଜଗାର କରୁଛନ୍ତି। ସେମାନେ ଏହି ଅଭିଯାନ ୨୦୦୫ରୁ ଜନଶିକ୍ଷା ଏବଂ ବିକାଶ ସଙ୍ଗଠନ ମାଧ୍ୟମରେ ଚଳାଇଛନ୍ତି। କୃଷକମାନଙ୍କ ପାଇଁ ବଜାର ବ୍ୟବସ୍ଥା କରିବା ସହ ସେମାନଙ୍କ ଉତ୍ପାଦକୁ ରାଜସ୍ଥାନର ବିଭିନ୍ନ ସହର ଓ ମହାରାଷ୍ଟ୍ରରେ ବିକ୍ରି କରିବାର ବ୍ୟବସ୍ଥା କରିଛନ୍ତି। ହଳଦୀଗୁଣ୍ଡ ପ୍ରସ୍ତୁତ କରି ୩,୫୦୦ ମହିଳା ସ୍ବୟଂସହାୟକ ଗୋଷ୍ଠୀ ମାଧ୍ୟମରେ ବଜାର ବ୍ୟବସ୍ଥାକୁ ବ୍ୟାପକ କରି ସେମାନଙ୍କୁ ରୋଜଗାରକ୍ଷମ କରିଛନ୍ତି ବ୍ୟାସ ଦମ୍ପତି। ହଳଦୀ ଚାଷ ସମ୍ପୂର୍ଣ୍ଣ ଜୈବିକ ପଦ୍ଧତିରେ ହେଉଥିବାରୁ ଏହାର ଚାହିଦା ରହିଛି। ହଳଦୀ ଚାଷକୁ ଗାଁ ଗାଁରେ ପହଞ୍ଚାଇବା ଦ୍ୱାରା ବାହାର ରାଜ୍ୟକୁ ଦାଦନ ଖଟିବାକୁ ଯାଉଥିବା ଲୋକମାନେ ଏହି ଚାଷରେ ଲାଗିପଡ଼ିଛନ୍ତି। ୟୁନିସେଫ୍ ଓ ଜିଲା ପ୍ରଶାସନ ସହାୟତାରେ ବ୍ୟାସ ଦମ୍ପତି ଏବେ ସୁଦ୍ଧା ବାହାରକୁ ଚାଲାଣ ହୋଇଥିବା ପ୍ରାୟ ୪,୦୦୦ ଶିଶୁଙ୍କୁ ଉଦ୍ଧାର କରିସାରିଲେଣି।