ପିଲାମାନଙ୍କ ସହଯୋଗରେ ୪୦ ଏକର ଶୁଷ୍କ ଜମିରେ ଜଙ୍ଗଲ ସୃଷ୍ଟି କରି ପ୍ରେରଣା ପାଲଟିଛନ୍ତି ପଶ୍ଚିମବଙ୍ଗର ନରେନ ହାନ୍ଦଶା। ସାନ୍ତାଳୀ ଜନଜାତିର ନରେନ ରହନ୍ତି ପୁରୁଲିଆ ଜିଲାର ଅଯୋଧ୍ୟା ପାହାଡ଼ ନିକଟସ୍ଥ ଜାହାଜପୁର ଗାଁରେ। ୮ମଶ୍ରେଣୀରୁ ପାଠପଢ଼ା ଛାଡି ସେ ରାସ୍ତାରେ ଲୋକଗୀତ ଗାଇ ବିଭନ୍ନ ବିଷୟରେ ସଚେତନ କରିବାରେ ଲାଗିଲେ। ଏହା ତାଙ୍କୁ ଢେର ଲୋକପ୍ରିୟତା ଦେଇଛି। କେବଳ ପଶ୍ଚିମବଙ୍ଗ ନୁହେଁ, ଝାଡ଼ଖଣ୍ଡ, ବିହାର, ଦିଲ୍ଲୀ, ପଞ୍ଚାବ ଏବଂ ମହାରାଷ୍ଟ୍ରରେ ବି ସେ ବେଶ୍ ଲୋକପ୍ରିୟ। ଲୋକସଙ୍ଗୀତରେ ରୁଚିଥିବା ନରେନ ଲୋକସେବା କ୍ଷେତ୍ରକୁ ଆପଣାଇ ୩୦ ଜଣ ଅନାଥ ପିଲାଙ୍କୁ ପୋଷ୍ୟ ଭାବେ ଗ୍ରହଣ କରି ସେମାନଙ୍କୁ ସମାଜର ମୁଖ୍ୟ ସ୍ରୋତକୁ ଆଣିବା ଲାଗି ପ୍ରଚେଷ୍ଟା ଜାରି ରଖିଛନ୍ତି। ସେ ‘ସିଡୋ କାହ୍ନୁ ମିଶନ ଫାଉଣ୍ଡେଶନ’ ଗଠନ କରି ତା’ମାଧ୍ୟମରେ ଏହି ଅଭିଯାନ ଜାରି ରଖିଛନ୍ତି। ଏହି ଫାଉଣ୍ଡେଶନ ଦ୍ୱାରା ସେ ସିଡୋ କାହ୍ନୁ ମିଶନ୍ ସ୍କୁଲ ପ୍ରତିଷ୍ଠା କରି ୪୦୦ ପିଲାଙ୍କୁ ମାଗଣାରେ ଶିକ୍ଷା ଦେଉଛନ୍ତି। ଏହି ପିଲାମାନଙ୍କ ସହଯୋଗରେ ଅଯୋଧ୍ୟା ପାହାଡ଼ର ୪୦ ଏକର ଜମିରେ ୧୦, ୦୦୦ ଗଛ ଲଗାଇ ଜଙ୍ଗଲ ସୃଷ୍ଟି କରିଛନ୍ତି ୪୬ ବର୍ଷୀୟ ନରେନ।