ଆଦିତ୍ୟ ବାଙ୍ଗରଙ୍କ ବୟସ ୧୭, କିନ୍ତୁ କାର୍ଯ୍ୟ ପ୍ରେରଣାଦାୟକ। ସେ ପ୍ରତିଦିନ ୧୦ ଟନ୍ ପ୍ଲାଷ୍ଟିକ ରିସାଇକ୍ଲିଂ କରି ସେଥିରୁ କପଡ଼ା ତିଆରି କରୁଛନ୍ତି। ରାଜସ୍ଥାନର ଭିଲ୍ଓ୍ବାରାରେ ରୁହନ୍ତି ବାଙ୍ଗର। ଜାନୁୟାରୀ ୨୦୨୧ରେ ‘ଟାର୍ସ ଟୁ ଟ୍ରେଜର’ ଷ୍ଟାର୍ଟଅପ୍ ଆରମ୍ଭ କରି ତା’ ମାଧ୍ୟମରେ ପ୍ଲାଷ୍ଟିକ୍ ରିସାଇକ୍ଲିଂ କରୁଛନ୍ତି। ସେ ମୁଖ୍ୟତଃ ପ୍ଲାଷ୍ଟିକ୍ ବଟଲ, ଓ୍ବାର୍ପର ଏବଂ କଭରରୁ ରିସାଇକ୍ଲିଂ ପଦ୍ଧତିରେ କପଡ଼ା ପ୍ରସ୍ତୁତ କରୁଛନ୍ତି। ଏହା କଟନ କପଡ଼ାଠାରୁ ବି ମଜଭୁତ ହେଉଛି। ଆଦିତ୍ୟ ଦ୍ୱାଦଶ ଶ୍ରେଣୀରେ ମାୟୋ କଲେଜରେ ପଢୁଛନ୍ତି। ତାଙ୍କ ପରିବାରର ଏକ ଟେକ୍ସଟାଇଲ ମାନୁଫାକ୍ଚରିଂ କମ୍ପାନୀ ଥିବାରୁ ସେ ପ୍ଲାଷ୍ଟିକ ବର୍ଜ୍ୟରୁ କପଡ଼ା ପ୍ରସ୍ତୁତ କରିବାକୁ ଇଚ୍ଛାପ୍ରକାଶ କରିଥିଲେ। ୧୦ମ ପଢ଼ିବା ବେଳେ ସେ ତାଙ୍କ ଦାଦାଙ୍କ ସହ ଚାଇନା ଯାଇଥିଲେ ଓ ସେଠାରୁ ଏଭଳି ପଦ୍ଧତି ସମ୍ପର୍କରେ ଜାଣିବାକୁ ପାଇଥିଲେ । ପରେ ‘ଟାର୍ସ ଟୁ ଟ୍ରେଜର’ ଷ୍ଟାର୍ଟଅପ୍ ଗଠନ କରି ଲକ୍ଷ୍ୟ ପଥରେ ଆଗେଇଛନ୍ତି। ଏହି ଅଭିଯାନରେ ତାଙ୍କ ପରିବାରର ପୂର୍ଣ୍ଣ ସହଯୋଗ ପାଉଛନ୍ତି। ସେ ଦେଶର ବିଭିନ୍ନ ସ୍ଥାନରେ ଥିବା ବର୍ଜ୍ୟ ସଂଗ୍ରହ କେନ୍ଦ୍ର ସହ ଯୋଗାଯୋଗ କରି ପ୍ଲାଷ୍ଟିକ୍ ବର୍ଜ୍ୟ ସଂଗ୍ରହ କରୁଛନ୍ତି ଏବଂ ପିଇଟି ଗ୍ରେଡ୍ ପ୍ଲାଷ୍ଟିକ୍ କେଜି ୪୦ ଟଙ୍କାରେ କିଣୁଛନ୍ତି।