ଡେରାଡୁନ୍ର ପ୍ରକୃତିପ୍ରେମୀ ମହେଶ ଚନ୍ଦ୍ର ଏବେ ଗଛଗୁଡ଼ିକୁ ଲୁହା ବନ୍ଧନରୁ ମୁକ୍ତି କରିବା ଲାଗି ଯେଉଁ ବାଟ ଦେଖାଇଛନ୍ତି ତାହା ବାସ୍ତବିକ ପ୍ରେରଣାଦାୟକ। ମହେଶ ଜଣେ ଅବସରପ୍ରାପ୍ତ ପୋଲିସ ଇନ୍ସପେକ୍ଟର। ଟ୍ରି ଗାର୍ଡରେ ବାନ୍ଧି ହୋଇଯାଇଥିତ୍ବା ଗଛର ପୀଡାକୁ ଅନୁଭବ କରି ପ୍ରଥମେ ସେ ଉତ୍ତରାଖଣ୍ଡର ମୁଖ୍ୟ ସଚିବ ଓ ରାଜ୍ୟପାଳଙ୍କୁ ଏ ସମ୍ପର୍କରେ ଅବଗତ କରିଥିଲେ। କିନ୍ତୁ ସୁଫଳ ନ ମିଳିବାରୁ ପିଏମ୍ଓକୁ ଅବଗତ କରିଥିଲେ। ପିଏମଓ ଏହା ଉପରେ ପଦକ୍ଷେପ ନେବା ଲାଗି ପରିବେଶ ମନ୍ତ୍ରଣାଳୟକୁ ନିର୍ଦ୍ଦେଶ ଦେବା ପରେ ମନ୍ତ୍ରଣାଳୟ ସବୁ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳକୁ ଆଦେଶ ଜାରି କରିଛନ୍ତି। ୨୦ ବର୍ଷ ତଳେ ସହର ଓ ଗ୍ରାମଗୁଡ଼ିକରେ ରୋପଣ କରାଯାଇଥିବା ଗଛଗୁଡ଼ିକର ସୁରକ୍ଷା ଲାଗି ଟ୍ରି ଗାର୍ଡ ଲଗାଯାଇଥିଲା। ଗଛ ବଡ଼ ହେବା ପରେ ଗାର୍ଡକୁ ବାହାର ନ କରିବାରୁ ତାହା ଗଛ ମଧ୍ୟରେ ପଶି ରହିଛି। ତେଣୁ ଗଛଗୁଡ଼ିକ ଭଲରେ ବଢ଼ିବା ଲାଗି ଏହାକୁ ହଟାଇବାର୍ ଲକ୍ଷ୍ୟରେ ମହେଶ ଏଭଳି ଅଭିଯାନ ଆରମ୍ଭ କରି ସଫଳ ହୋଇଛନ୍ତି। କେତେକ ରାଜ୍ୟରେ ଏହା ଉପରେ କାର୍ଯ୍ୟ ଆରମ୍ଭ ହୋଇଗଲାଣି। ଉତ୍ତରାଖଣ୍ଡରେ ମଧ୍ୟ ଗଛଗୁଡ଼ିକୁ ଟ୍ରି ଗାର୍ଡ ବେଡିରୁ ମୁକ୍ତ କରାଯିବା ଲାଗି କାର୍ଯ୍ୟ ଆରମ୍ଭ କରାଯାଇଛି। ମହେଶଙ୍କ ଏହି ପ୍ରୟାସକୁ ସବୁ ସ୍ତରରେ ପ୍ରଶଂସା କରାଯାଉଛି।