୨୩ ବର୍ଷ ଧରି ରାସ୍ତାକଡ଼ରେ ବିିପଜ୍ଜନକ ସ୍ଥିତିରେ ଥିବା ମହିଳାମାନଙ୍କୁ ଉଦ୍ଧାର କରି ସେବାର ଯଥାର୍ଥତା ପ୍ରତିପାଦନ କରିଛନ୍ତି ଏକ ଯୁବ ଡାକ୍ତର ଦମ୍ପତି। ଡା. ରାଜେନ୍ଦ୍ର ଏବଂ ଡା. ସୁଚେତା ଧମାନି ଏଯାବତ୍ ୫୦୦ରୁ ଊର୍ଦ୍ଧ୍ୱ ଅସହାୟା ମହିଳାଙ୍କୁ ରାସ୍ତାକଡ଼ରୁ ଉଦ୍ଧାର କରି ସାରିଲେଣି। ମାନସିକ ବିକାରଗ୍ରସ୍ତ ମହିଳାମାନଙ୍କୁ ସେମାନଙ୍କ ପରିବାର ରାସ୍ତାରେ ଛାଡ଼ି ଦେବା ପରେ ଏହି ଦମ୍ପତି ସେମାନଙ୍କୁ ଉଦ୍ଧାର କରୁଛନ୍ତି ଓ ଯନତ୍ ନେଉଛନ୍ତି। ଡାକ୍ତର ଦମ୍ପତି ଅହମଦାବାଦରେ ‘ମୌଳି ସେବା ପ୍ରତିଷ୍ଠାନ’ ଗଢ଼ି ତା’ ମାଧ୍ୟମରେ ଏହି ଅଭିଯାନ ଚଳାଇଛନ୍ତି। ଡା. ରାଜେନ୍ଦ୍ର ଏବଂ ସୁଚେତା ୧୯୯୮ରେ ଅହମଦାବାଦର କେ.ଏମ୍. ମେଡିକାଲ କଲେଜରୁ ଡିଗ୍ରୀ ହାସଲ କରିବା ପରେ ନିୟମିତ ରୋଗୀ ଚିକିତ୍ସା କରିବା ସହ ମାଗଣାରେ ମେଡିକାଲ କ୍ୟାମ୍ପ୍ ଆୟୋଜନ କରୁଥିଲେ। ସେମାନେ ମଧ୍ୟ ଗୃହହୀନ ଏବଂ ଅସହାୟ ଲୋକମାନଙ୍କୁ ଖାଦ୍ୟ ଦେବା ଆରମ୍ଭ କରିଥିତ୍ଲେ। ଏହି ସମୟରେ ରାସ୍ତାକଡ଼ରେ ବିପଜ୍ଜନକ ଅବସ୍ଥାରେ ଏବଂ ଭୋକରେ ଦିନ କାଟୁଥିବା ମହିଳାମାନଙ୍କ ଅବସ୍ଥା ଦେଖି ଡାକ୍ତର ଦମ୍ପତି ମୌଳି ସେବା ପ୍ରତିଷ୍ଠାନ ଗଢ଼ିଥିଲେ। ପ୍ରଥମେ ସେମାନେ ୯୦ ଜଣ ଗୃହହୀନଙ୍କୁ ଖାଦ୍ୟ ଦେଉଥିଲେ। ପରେ ଗୃହହୀନ ଓ ମାନସିକ ବିକାରଗ୍ରସ୍ତ ମହିଳାଙ୍କ ସେବାରେ ନିଜକୁ ଉତ୍ସର୍ଗ କରିଥିଲେ। ୨୩ ବର୍ଷ ମଧ୍ୟରେ ସେମାନେ ୫୦୦ରୁ ଊର୍ଦ୍ଧ୍ୱ ମହିଳାଙ୍କୁ ଉଦ୍ଧାର କରିସାରିଲେଣି। ଅନେକ ସୁସ୍ଥ ହୋଇ କେନ୍ଦ୍ରରେ ସେବା କରୁଛନ୍ତି। ରୋଗ କିମ୍ବା ବାର୍ଦ୍ଧକ୍ୟ ଯୋଗୁ ଅନେକଙ୍କର ବି ଦେହାନ୍ତ ଘଟିଛି। ସେବା କେନ୍ଦ୍ରରେ ଏବେ ୩୫୦ ମହିଳା ରହିଛନ୍ତି। ଏହି କାର୍ଯ୍ୟରେ କିଛି ସ୍ବେଚ୍ଛାସେବୀ ସହଯୋଗ କରୁଛନ୍ତି ବୋଲି କହନ୍ତି ଡା. ରାଜେନ୍ଦ୍ର।