ଶିକ୍ଷାର ପ୍ରସାର ସହ ପରିବେଶ ସୁଧାରିବା ଅଭିଯାନରେ ବ୍ରତୀ ହୋଇଛନ୍ତି ଆସାମର ଦମ୍ପତି ପ୍ରମିତା ଶର୍ମା ଓ ମାଜିନ ମୁଖତାର। ଦୁହେଁ ପାମୋହି ଅଞ୍ଚଳରେ ଏକ ସ୍କୁଲ ଖୋଲି ଅସହାୟ ପିଲାମାନଙ୍କୁ ମାଗଣାରେ ପଢ଼ାଉଛନ୍ତି। ଏହାସହ ପାମୋହିର ବିଭିନ୍ନ ଗାଁରେ ଏମାନେ ପ୍ଲାଷ୍ଟିକର ପରିବେଶଗତ ପ୍ରଭାବ ସମ୍ପର୍କରେ ସଚେତନତା ସୃଷ୍ଟି କରୁଛନ୍ତି। ୨୦୧୬ରେ ୨୦ଜଣ ପିଲାଙ୍କୁ ନେଇ ସ୍କୁଲ ପ୍ରତିଷ୍ଠା କରାଯାଇଥିଲା। ଏବେ ସ୍କୁଲରେ ୪ରୁ ୧୫ ବର୍ଷ ବୟସର ୧୧୦ ଜଣ ପିଲା ପଢ଼ୁଛନ୍ତି। ପିଲାମାନେ ପ୍ରତି ସପ୍ତାହରେ ସେମାନଙ୍କ ତଥା ପଡ଼ୋଶୀଙ୍କ ଘରୁ ପ୍ରାୟ ୨୫ ପ୍ରକାର ପ୍ଲାଷ୍ଟିକ ବର୍ଜ୍ୟ ସଂଗ୍ରହ କରି ସ୍କୁଲରେ ଜମା ଦେଉଛନ୍ତି। ସଂଗୃହୀତ ପ୍ଲାଷ୍ଟିକ୍କୁ ସ୍କୁଲ୍ ଫି’ ଭାବେ ଗଣାଯାଉଛି। ଏହାକୁ ରିସାଇକ୍ଲିଂ ସେଣ୍ଟରକୁ ପଠାଯାଉଛି। ପାମୋହି ଅଞ୍ଚଳରେ ପିଲାଙ୍କ ଶୈଶବ ଖଣି ଖାଦାନର ଅନ୍ଧକାର ମଧ୍ୟରେ ହଜିଯାଏ। ପିଲାମାନେ କାମ କରି ଦିନକୁ ୧୫୦ରୁ ୨୦୦ଟଙ୍କା ରୋଜଗାର କରି ଶିକ୍ଷାରୁ ଦୂରେଇ ଯାଆନ୍ତି । ତେବେ ପିଲାମାନଙ୍କୁ ଶିକ୍ଷାର ମୁଖ୍ୟ ସ୍ରୋତରେ ସାମିଲ କରିବା ଲାଗି ଦମ୍ପତିଙ୍କ ପ୍ରୟାସ ନୂତନ ଆଶା ସଞ୍ଚାର କରିଛି। ଆଗାମୀ ୫ ବର୍ଷରେ ସେମାନେ ଦେଶର ବିଭିନ୍ନ ଅଞ୍ଚଳରେ ଏଭଳି ୧୦୦ଟି ସ୍କୁଲ ଖୋଲିବାକୁ ଯୋଜନା ରଖିଛନ୍ତି।