ତାମିଲନାଡୁର ଦିବ୍ୟାଙ୍ଗ ମହିଳା ଡି. ଇନ୍ଦ୍ରା। ଜୀବନର ପ୍ରତିକୂଳ ସ୍ଥିତିକୁ ସାମନା କରି ଦିବ୍ୟାଙ୍ଗ ଶିଶୁଙ୍କୁ ସମାଜର ମୁଖ୍ୟ ସ୍ରୋତରେ ସାମିଲ କରିବା ପାଇଁ ଯେଉଁ ନିଷ୍ଠାପର ପ୍ରୟାସ ଜାରି ରଖିଛନ୍ତି ତାହା ବାସ୍ତବିକ ପ୍ରଶଂସନୀୟ। ଇନ୍ଦ୍ରା ହ୍ବିଲଚେୟାରରେ ଯିବାଆସିବା କରନ୍ତି। ରହନ୍ତି କାଞ୍ଚତ୍ପୁରମ ଜିଲା ସରୁନାଲୁର ଗାଁରେ। ସେଠାରେ ‘ପ୍ରେମ୍ଇଲମ’ ନାମକ ଆଶ୍ରୟସ୍ଥଳି ପ୍ରତିଷ୍ଠା କରି ୩୦୦ ଦିବ୍ୟାଙ୍ଗ ଶିଶୁକନ୍ୟାଙ୍କ ସାହାରା ପାଲଟିଛନ୍ତି। ସେଠାରେ ପିଲାଙ୍କର ଖାଇବା, ଚିକିତ୍ସା ଓ ଶିକ୍ଷା ଲାଗି ଆବଶ୍ୟକ ଖର୍ଚ୍ଚ ନିଜେ ବହନ କରୁଛନ୍ତି। ବଡ଼ କଥା ହେଉଛି ପିଲାମାନେ କିଭଳି ପୁଷ୍ଟିକର ଖାଦ୍ୟ ଖାଇବେ ସେଥିପାଇଁ ସେ ଜୈବିକ ଚାଷ କରୁଛନ୍ତି। ଆଶ୍ରୟସ୍ଥଳୀର କର୍ମଚାରୀଙ୍କ ସହାୟତାରେ ଧାନ, ଫଳ ଓ ପନିପରିବା ଚାଷ କରି ପିଲାମାନଙ୍କୁ ଖାଇବାକୁ ଦେଉଛନ୍ତି। ଇନ୍ଦ୍ରା ସ୍ନାତ୍ତୋକୋତ୍ତର ଡିଗ୍ରୀ ହାସଲ କରିଛନ୍ତି। ସ୍ବାବଲମ୍ବୀ ହେବାକୁ ପ୍ରଥମେ ସେ ଚାକିରି କରିଥିଲେ। ହେଲେ ଦିବ୍ୟାଙ୍ଗ ପିଲାଙ୍କ ଜୀବନରେ ପରିବର୍ତ୍ତନ ଆଣିବା ପାଇଁ ଚାକିରି ଛାଡ଼ି ‘ପ୍ରେମ ଇଲମ’ ପ୍ରତିଷ୍ଠା କରିଥିଲେ। ବ୍ୟକ୍ତିଗତ ଉଦ୍ୟମରେ ପାଣ୍ଠି ଯୋଗାଡ଼ କରି ଏହି ଆଶ୍ରୟସ୍ଥଳୀ ପରିଚାଳନା କରୁଛନ୍ତି। ସେ ଉତ୍ପାଦିତ ଖାଦ୍ୟଶସ୍ୟରେ ନିୟମିତ ଆଶ୍ରମର ଆବଶ୍ୟକତାଠାରୁ ଅଧିକ ଖାଦ୍ୟ ପ୍ରସ୍ତୁତ କରି ନିକଟସ୍ଥ ଅସହାୟ ଲୋକଙ୍କୁ ଦେଉଛନ୍ତି। ୯୦ ପ୍ରତିଶତ ଦିବ୍ୟାଙ୍ଗ ଇନ୍ଦ୍ରାଙ୍କ ବୟସ ୩୬। ଜନ୍ମର ୫ ମାସ ବେଳକୁ ସେ ପୋଲିଓରେ ଆକ୍ରାନ୍ତ ହୋଇଥିଲେ। ହେଲେ ସବୁପ୍ରକାର ଆହ୍ବାନକୁ ସମ୍ମୁଖୀନ ହୋଇ ସଫଳତା ପାଇବାରେ ଜଣଙ୍କୁ ସାହାଯ୍ୟ କର ବୋଲି କହନ୍ତି ଇନ୍ଦ୍ରା।