ଆଭିଏଶନ କ୍ୟାରିୟର ଛାଡ଼ି ବଳାତ୍କାର ପୀଡ଼ିତାଙ୍କ ପାଇଁ ନ୍ୟାୟିକ ଲଢ଼େଇ କରୁଛନ୍ତି ଦିଲ୍ଲୀର ଯୋଗିତା ଭାୟାନା। ସେ ବିପର୍ଯ୍ୟୟ ପରିଚାଳନାରେ ସ୍ନାତକୋତ୍ତର ଡିଗ୍ରୀ ହାସଲ କରିବା ପରେ କିଙ୍ଗ୍ଫିଶର ଏୟାରଲାଇନରେ ଭଲ ଚାକିରି ପାଇଥିଲେ। ନିର୍ଭୟା ଘଟଣା ପରେ ସେ ଏହି କାର୍ଯ୍ୟ କରିବାକୁ ନିଷ୍ପତ୍ତି ନେଇ ଚାକିରି ଛାଡ଼ିଥିଲେ। ପରେ ପିପୁଲ ଏଗ୍ନେଷ୍ଟ ରେପ୍ ଇନ୍ ଇଣ୍ଡିଆ(ପିଏଆର୍ଆଇ-ପରି) ସଂସ୍ଥା ଗଠନ କରି ବଳାତ୍କାର ପୀଡ଼ିତାଙ୍କୁ ନ୍ୟାୟ ପ୍ରାପ୍ତି ପାଇଁ ସହଯୋଗ କରୁଛନ୍ତି। ସେ ବହୁ ବଳାତ୍କାର ପୀଡ଼ିତାଙ୍କୁ ସାହାଯ୍ୟ କରିସାରିଲେଣି। ସେମାନଙ୍କ ମଧ୍ୟରୁ ଅନେକଙ୍କୁ ଥଇଥାନ ମଧ୍ୟ କରିଛନ୍ତି। ଏହା ପୂର୍ବରୁ ଯୋଗିତା ଡାସ୍ ଚାରିଟେବ୍ଲ ଫାଉଣ୍ଡେଶନ ଗଠନ କରି ଦୁର୍ଘଟଣାଗ୍ରସ୍ତ ଲୋକଙ୍କୁ ସାହାଯ୍ୟ କରୁଥିଲେ। ହେଲେ ନିର୍ଭୟା ଘଟଣା ପରେ ସେ ବିଭିନ୍ନ ଅଞ୍ଚଳର ବଳାତ୍କାର ପୀଡ଼ିତାଙ୍କ ପକ୍ଷରେ କୋର୍ଟରେ ସାକ୍ଷୀ ଭାବେ ଉପସ୍ଥିତ ରହୁଛନ୍ତି ଓ ସେମାନଙ୍କୁ କ୍ଷତିପୂରଣ ପାଇବାରେ ସାହାଯ୍ୟ କରୁଛନ୍ତି। କେବଳ ଏତିକି ନୁହେଁ, ଆର୍ଥିକ ସ୍ତରରେ ଦୁର୍ବଳ ଥିବା ୧,୦୦୦ରୁ ଅଧିକ ମହିଳାଙ୍କୁ ‘ପରି’ ମାଧ୍ୟମରେ ଟ୍ୟାକ୍ସି ଡ୍ରାଇଭର ପ୍ରଶିକ୍ଷଣ ଦେଇ ଯୋଗିତା ସେମାନଙ୍କୁ ରୋଜଗାରକ୍ଷମ କରିପାରିଛନ୍ତି।