ହରିଆଣାର ଜଣେ ରିକ୍ସାବାଲାଙ୍କ ସଫଳତା କାହାଣୀ ବେଶ୍ ପ୍ରେରଣାଦାୟକ। ଯମୁନାନଗର ଜିଲା ଡାମ୍ଲା ଗାଁ ନିବାସୀ ଧରମବୀର କମ୍ବୋଜ ନିଷ୍ଠା ବଳରେ ଜଣେ କୃଷକ, ଗ୍ରାମୀଣ ଉଦ୍ଭାବକ ତଥା ଉଦ୍ୟୋଗୀ ହୋଇପାରିଛନ୍ତି। ନିଜେ ଲକ୍ଷାଧିକ ଟଙ୍କା ରୋଜଗାର କରିବା ସହ ହଜାର ହଜାର ଲୋକଙ୍କୁ ଆତ୍ମନିର୍ଭର କରିଛନ୍ତି। ଧରମବୀର ଦିଲ୍ଲୀରେ ରିକ୍ସା ଟାଣିବା ସହ ବିଭିନ୍ନ କାମ କରୁଥିଲେ। ପରେ ଗାଁକୁ ଫେରି ଚାଷ ଆରମ୍ଭ କରିଥିଲେ ଓ ନିଜ ଜ୍ଞାନକୌଶଳରେ ଏକ ଛୋଟ ଫୁଡ୍ ପ୍ରୋସେସିଂ ମେଶିନ ତିଆରି କରି ଖାଦ୍ୟ ପ୍ରୋସେସିଂ ଆରମ୍ଭ କଲେ। ଏବେ ଏଥିରୁ ସେ ବାର୍ଷିକ ୮ ଲକ୍ଷ ଟଙ୍କା ରୋଜଗାର କରୁଛନ୍ତି। ସେ ୨ ଏକର ବିଶିଷ୍ଟ ଫାର୍ମର ମାଲିକ ଓ ଏହି ଫାର୍ମରୁ ଜୈବିକ ଶସ୍ୟ ଉତ୍ପାଦନ କରି ତାହାକୁ ପ୍ରୋସେସିଂ କରି ବିକ୍ରି କରୁଛନ୍ତି। ଧରମବୀର ଫୁଡ୍ ପ୍ରୋସେସିଂ ପ୍ରାଇଭେଟ୍ ଲିମିଟେଡ୍ ଗଠନ କରି ଦେଶରେ ଫୁଡ୍ ପ୍ରୋସେସିଂ ସମ୍ପର୍କରେ ପ୍ରସେସିଂ କାର୍ଯ୍ୟକ୍ରମ ଓ କର୍ମଶାଳାର ଆୟୋଜନ କରି ୭,୦୦୦ କୃଷକଙ୍କୁ ପ୍ରଶିକ୍ଷଣ ଦେଇସାରିଛନ୍ତି ଏବଂ ଏମାନଙ୍କ ମଧ୍ୟରୁ ୪,୦୦୦ ମହିଳା ରହିଛନ୍ତି। ନିଜ ହାତ ତିଆରି ପ୍ରୋସେସିଂ ମେଶିନର ପାଣ୍ଟେଟ୍ କରି ତାହାକୁ ବିକ୍ରି କରୁଛନ୍ତି ଓ ଏ ବାବଦରେ ବାର୍ଷିକ ୧୫-୨୦ ଲକ୍ଷ ଟଙ୍କା ପାଉଛନ୍ତି। ସେ ମଧ୍ୟ ତାଙ୍କ ଫୁଡ୍ ପ୍ରୋସେସିଂ ମେଶିନକୁ ଆମେରିକା, ଇଟାଲୀ, ନେପାଳ, ଅଷ୍ଟ୍ରେଲିଆ, କେନିଆ, ନାଇଜେରିଆ, ଜିମ୍ବାଓ୍ବେ, ଉଗାଣ୍ଡା ଆଦି ଦେଶକୁ ରତ୍ପାନୀ କରୁଛନ୍ତି। ଧରମବୀର ସ୍କୁଲରେ ପଢ଼ୁଥିବା ବେଳେ ଅଷ୍ଟମ ଶ୍ରେଣୀରେ ଏକ ବ୍ୟାଟେରୀ ସେଲ୍ ଓଡିକେଡ୍ସ ବ୍ୟବହାର କରି ଲ୍ୟାମ୍ପ ପ୍ରସ୍ତୁତ କରିଥିଲେ। ଶିକ୍ଷାରେ ବାଧା ଆସିବା ପରେ ଦିଲ୍ଲୀ ଆସି ରିକ୍ସା ଟାଣି ରୋଜଗାର କରିଥିଲେ। କିନ୍ତୁ ସମୟ ତାଙ୍କୁ ପୁଣି ଉଦ୍ଭାବନ କରିବାକୁ ପ୍ରେରିତ କଲା ଓ ସଫଳତାର ଶୀର୍ଷରେ ପହଞ୍ଚାଇ ପାରିଲା। କୃଷି ସହ ଜଡ଼ିତ ଥିବାରୁ ଲୋକେ ତାଙ୍କୁ ଶ୍ରଦ୍ଧାରେ ‘କିଶାନ ଧରମବୀର’ ବୋଲି ସମ୍ବୋଧନ କରୁଛନ୍ତି।