ଅଦରକାରୀ କପଡ଼ାରୁ ବିଭିନ୍ନ ବ୍ୟବହାରଯୋଗ୍ୟ ଜିନିଷ ତିଆରି କରିବା ସହ ୪୦ ଜଣ ମହିଳାଙ୍କୁ ନିଯୁକ୍ତି ଦେଇ ଏକ ଉଦାହରଣ ସୃଷ୍ଟି କରିଛନ୍ତି କେରଳର ସଞ୍ଜୁ ସୋମାନ। ସଞ୍ଜୁଙ୍କ ବୟସ ୨୮। ସେ ଏବେ ସୁଦ୍ଧା ୩୦,୦୦୦ କେଜି ଅଦରକାରୀ କପଡ଼ାର ପୁନଃ ଉପଯୋଗ କରିସାରିଲେଣି। କଠିନ ବର୍ଜ୍ୟର ଉପଯୋଗ ଏବଂ ଜଳବାୟୁ ପରିବର୍ତ୍ତନ କ୍ଷେତ୍ରରେ ମଧ୍ୟ ସେ ଉଲ୍ଲେଖନୀୟ କାର୍ଯ୍ୟ କରିଛନ୍ତି। ଏଥିପାଇଁ ଜାତିସଂଘର ୧୭ ଜଣିଆ କ୍ଲାଇମେଟ୍ ଲିଡର୍ଙ୍କ ମଧ୍ୟରେ ସେ ସ୍ଥାନ ପାଇପାରିଛନ୍ତି। ସଞ୍ଜୁ ନିଜସ୍ବ ଉଦ୍ୟମରେ କେରଳର ଆଲପୁଝା ଜିଲାର ମୁହାମ୍ମାରେ ପ୍ରଥମେ ‘ମଡେଲ୍ ଓ୍ବେଟ୍ଲ୍ୟାଣ୍ଡ ଭିଲେଜ୍’ କନ୍ସେପ୍ଟ କାର୍ଯ୍ୟକାରୀ କରିଛନ୍ତି। ସେ ତ୍ରିଭେନ୍ଦ୍ରମରେ ପ୍ରଥମେ ‘ସେଭ୍ ଏ ରୁପି ସ୍ପ୍ରେଡ୍ ସ୍ମାଇଲ’ ଏନ୍ଜିଓ ଆରମ୍ଭ କରି ସାମାଜିକ କାର୍ଯ୍ୟରେ ନିଜକୁ ନିୟୋଜିତ କରିଥିଲେ। ୫ ବର୍ଷରେ ସେ ପାଖାପାଖି ୭ ଲକ୍ଷ ଟଙ୍କା ଯୋଗାଡ଼ କରି ତାହାକୁ କ୍ୟାନ୍ସର ରୋଗୀଙ୍କ ସେବାରେ ବ୍ୟୟ କରିଥିଲେ। ଏବେ ତାଙ୍କ ଏନ୍ଜିଓରେ ୩୦୦ରୁ ଊର୍ଦ୍ଧ୍ୱ ସ୍ବେଚ୍ଛାସେବୀ ଯୋଗ ଦେଇ ବିଭିନ୍ନ ପରିବେଶ ଅନୁକୂଳ କାର୍ଯ୍ୟ କରୁଛନ୍ତି। ବିଭିନ୍ନ ଗାଁରେ ଶହ ଶହ ମହିଳାଙ୍କୁ ମତ୍ସ୍ୟଚାଷ ଉପରେ ପ୍ରଶିକ୍ଷଣ ଦେଉଛନ୍ତି। ବର୍ଷାଜଳ ସଂରକ୍ଷଣକୁ ପ୍ରୋତ୍ସାହିତ କରିବା ସହ କୃଷିରେ ବିକାଶ ପାଇଁ ପ୍ରୟାସ ଜାରି ରଖିଛନ୍ତି।
