ଜଣେ ସଫ୍ଟଓ୍ବେର ଇଞ୍ଜିନିୟରଙ୍କ ପ୍ରେରଣାଦାୟୀ କାର୍ଯ୍ୟ ଦେଖିବାକୁ ମିଳିଛି ପୁଣେରେ। ଅମିତା ଦେଶପାଣ୍ଡେ ଆଇଟିରେ ଡିଗ୍ରୀ ହାସଲ କରିବା ପରେ ଚରଖା ଓ ତନ୍ତ ବ୍ୟବହାର କରି ଅଦରକାରୀ ପ୍ଲାଷ୍ଟିକ ଓ୍ବର୍ପରରୁ ଆକର୍ଷଣୀୟ ବ୍ୟାଗ୍ ତିଆରି କରୁଛନ୍ତି। ସ୍ବାଧୀନତା ସଂଗ୍ରାମ ସମୟରେ ଚରଖା ବ୍ୟବହାର ବିଦେଶୀ କପଡ଼ା ବର୍ଜନକରି ସ୍ବଦେଶୀ ବସ୍ତ୍ର ପାଇଁ ବୈପ୍ଳବିକ ଧାରା ସୃଷ୍ଟି କରିଥିଲା। ଏବେ ଅମିତାଙ୍କ ଦ୍ୱାରା ଅଦରକାରୀ ପ୍ଲାଷ୍ଟିକର ପୁନଃ ଉପଯୋଗ ପୁଣି ଚରଖାର ଆଦରକୁ ସ୍ମରଣ କରିଛି। ପରିବେଶ ସଂରକ୍ଷଣରେ ଚରଖା ପ୍ରମୁଖ ଭୂମିକା ନେଇପାରେ ତାହା ଏଥିରୁ ପ୍ରମାଣିତ ହୋଇଛି। ଏହି କାର୍ଯ୍ୟ ପାଇଁ ସେ ‘ରି-ଚରଖା’ ସୋସିଆଲ ଏଣ୍ଟରପ୍ରାଇଜ ପ୍ରତିଷ୍ଠା କରିଛନ୍ତି। ଏଥିରେ ସେ ବହୁ ବର୍ଜ୍ୟ ସଂଗ୍ରହକାରୀଙ୍କୁ ନିଯୁକ୍ତି ଦେଇଛନ୍ତି। ଗତବର୍ଷ ସେ ୭ଲକ୍ଷ ପ୍ଲାଷ୍ଟିକ ଓ୍ବର୍ପରର ପୁନଃ ଉପଯୋଗ କରିବାକୁ ସକ୍ଷମ ହୋଇପାରିଛନ୍ତି। ସେ ମୁଖ୍ୟତଃ ବ୍ୟାଗ୍, ଡେକୋର ଆଇଟମ୍, ଝୁଲା, ଷ୍ଟୋରେଜ୍ ବାସ୍କେଟ, ଗ୍ରୋପଟ୍, ଟେବୁଲ ମ୍ୟାଟ୍ ଆଦି ସାମଗ୍ରୀ ପ୍ରସ୍ତୁତ କରୁଛନ୍ତି। ମହାମାରୀ ପୂର୍ବରୁ ସେ ଏଥିରୁ ୭୦ ଲକ୍ଷ ଟଙ୍କାର ବ୍ୟବସାୟ କରିଥିଲେ। ୨୦୦୫ରେ ଆଇଟି କମ୍ପାନୀରେ ନିଯୁକ୍ତି ପାଇ ୨୦୦୯ ଯାଏ କାର୍ଯ୍ୟ କରିବା ପରେ ଉଚ୍ଚତର ଶିକ୍ଷା ପାଇଁ ଆମେରିକା ଯାଇଥିଲେ। ସେଠାରୁ ଫେରି ଏହି କାର୍ଯ୍ୟ କରିବାକୁ ନିଷ୍ପତ୍ତି ନେଇଥିଲେ। ପ୍ଲାଷ୍ଟିକକୁ ଚରଖାରେ ପ୍ରଥମେ ଡୋର ବା ସୂତା ଆକାର ଦିଆଯାଇ ପରେ ପ୍ଲାଷ୍ଟିକ ଫାଇବର ସହ ଏହାକୁ ତନ୍ତରେ ବୁଣାଯାଉଛି। ଏହି ପଦ୍ଧତିରେ ଶକ୍ତି ଅପଚୟ କମ୍ ହେବା ସହ ନିଯୁକ୍ତି ସୁଯୋଗ ସୃଷ୍ଟି ହୋଇପାରୁଛି।