ଗୋଟିଏପଟେ କାର୍ଯ୍ୟ ଓ ଅନ୍ୟପକ୍ଷେ ଅସହାୟ ପିଲାଙ୍କୁ ଟିଉଶନ ସୁବିଧା ଯୋଗାଇଦେବା ଦାୟିତ୍ୱ ନିର୍ବାହ କରିବା କଷ୍ଟକର ହେଲେ ମଧ୍ୟ ବିହାରର ତିନିଜଣ ସରକାରୀ ଅଧିକାରୀ ଏହାକୁ ନିର୍ବାହ କରି ଏକ ଉଦାହରଣ ସୃଷ୍ଟି କରିଛନ୍ତି। ସନ୍ତୋଷ କୁମାର, ବିଜୟ କୁମାର ଏବଂ ରଞ୍ଜନ କୁମାର ଆମ୍ବେଡକର ଇନିସିଏଟିଭ ଫର୍ ମାର୍ଜିନାଲାଇଡ୍ (ଏଆଇଏମ୍) ପାଠଶାଳା ପ୍ରତିଷ୍ଠା କରି ଅସହାୟ ପିଲାମାନଙ୍କୁ ମାଗଣାରେ ଶିକ୍ଷା ପ୍ରଦାନ କରୁଛନ୍ତି। ଶିକ୍ଷା ଲାଗି ଆବଶ୍ୟକ ସମସ୍ତ ପ୍ରକାର ଉପକରଣ ମଧ୍ୟ ମାଗଣାରେ ପିଲାମାନଙ୍କୁ ଯୋଗାଉଛନ୍ତି। ଗୋପାଳଗଞ୍ଜ, ଓ୍ୟରଙ୍ଗାବାଦ ଏବଂ ସମସ୍ତିପୁର ଜିଲାର ତିନୋଟି କେନ୍ଦ୍ରରେ ୪୫୦ରୁ ଊର୍ଦ୍ଧ୍ୱ ଛାତ୍ରୀଛାତ୍ରଙ୍କୁ ଶିକ୍ଷା ଦେବାର ବ୍ୟବସ୍ଥା କରାଯାଇଛି। ଏହି ୩ ଜଣ ସବୁ ଖର୍ଚ୍ଚ ନିଜେ ବହନ କରୁଛନ୍ତି। ସନ୍ତୋଷ ଅରୁଣାଚଳ ପ୍ରଦେଶ ଷ୍ଟାଫ୍ ସିଲେକ୍ସନ (ଏପିଏସ୍ଏସ୍ବି)ର ସଚିବ ରହିଛନ୍ତି। ରଞ୍ଜନ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସ (ସିଆର୍ପିଏଫ୍)ର ଆସିଷ୍ଟାଣ୍ଟ କମାଣ୍ଡାଣ୍ଟ ଏବଂ ବିଜୟ ଇଣ୍ଡିଆନ୍ ରେଲ୍ଓ୍ବେ ଟ୍ରାଫିକ୍ ସର୍ଭିସ (ଆଇଆର୍ଟିଏସ୍)ର ଜଣେ ଅଧିକାରୀ ଭାବେ ଦାୟିତ୍ୱ ତୁଲାଉଛନ୍ତି। ଏମାନେ ବିହାରର ଭିନ୍ନ ଭିନ୍ନ ଗଁାର ହେଲେ ମଧ୍ୟ ଏଭଳି ଅଭିଯାନ ସମ୍ମିଳିତ ଭାବେ ଚଳାଉଛନ୍ତି। ସକାଳ ୭ରୁ ୯ଟା ମଧ୍ୟରେ ପ୍ରଥମରୁ ୧୦ମ ପିଲାଙ୍କୁ ପଢ଼ାଯାଉଛିି। ଦରକାର ପଡ଼ିଲେ ବାହାରୁ ବିଭିନ୍ନ ବିଷୟର ଅଭିଜ୍ଞ ଶିକ୍ଷକମାନଙ୍କୁ ଆଣି ପିଲାମାନଙ୍କ ଶିକ୍ଷା ସମ୍ପର୍କିତ ଦ୍ୱନ୍ଦ୍ୱ ଦୂର ପାଇଁ ବ୍ୟବସ୍ଥା କରାଯାଉଛି। ପ୍ରତି ସପ୍ତାହରେ ପରୀକ୍ଷା ମଧ୍ୟ କରାଯାଉଛି।