ଭାରତରେ ବର୍ଜ୍ୟର ପୁନଃ ଉପଯୋଗ ଲାଗି ଦୁଇ ଇଞ୍ଜିନିୟରଙ୍କ ପ୍ରୟାସ ଯୁବପିଢ଼ିଙ୍କ ଲାଗି ଏକ ଦୃଷ୍ଟାନ୍ତ ପାଲଟିଛି। ଏହି ଦୁଇ ଇଞ୍ଜିନିୟର ହେଉଛନ୍ତି ଦର୍ଶନ ଚାଲ୍ଲୁର ଏବଂ ଚନ୍ଦନ କଗନାପଲ୍ଲି। ସେମାନେ ବର୍ଜ୍ୟରୁ ଜୈବିକ ଖତ ପ୍ରସ୍ତୁତ କରୁଛନ୍ତି। କିଲୋ ପ୍ରତି ୪ ଟଙ୍କା ମୂଲ୍ୟରେ ସେମାନେ ଏହି ଖତକୁ କୃଷକମାନଙ୍କୁ ବିକ୍ରି କରୁଛନ୍ତି। ଫଳରେ ହଜାର ହଜାର କୃଷକ ଉପକୃତ ହେଉଛନ୍ତି। ଗୋଟିଏ ପଟେ ବର୍ଜ୍ୟର ପୁନଃ ଉପଯୋଗ କରି ପରିବେଶ ସୁରକ୍ଷା କରିବା ସହ କୃଷକମାନଙ୍କୁ ରାସାୟନିକ ମୁକ୍ତ ଚାଷ ଲାଗି ପ୍ରୋତ୍ସାହିତ କରୁଛନ୍ତି। ତିରୁମାଲା ତିରୁପତି ଦେବସ୍ଥାନମ୍କୁ ପ୍ରତିବର୍ଷ ୪୦ ଲକ୍ଷ ଶ୍ରଦ୍ଧାଳୁ ଆସିଥାଆନ୍ତି ଓ ସେଠାରେ ୪୦ ଟନ ବର୍ଜ୍ୟ ଠୁଳ ହୋଇଥାଏ। ଏତେ ପରିମାଣ ବର୍ଜ୍ୟର ପୁନଃ ଉପଯୋଗ କରିବା ଲାଗି ସେମାନେ ୨୦୨୦ରେ ଇକୋଫିନିକ୍ସ ଷ୍ଟାର୍ଟଅପ୍ ଗଠନ କରି ଜୈବିକ ବର୍ଜ୍ୟରୁ ୪୦ ଦିନ ମଧ୍ୟରେ ଜୈବିକ ଖତ ପ୍ରସ୍ତୁତ କରିପାରିଛନ୍ତି। ଖତ ବିକ୍ରି କରି ସେମାନେ ବର୍ଷକୁ ୧୦ ଲକ୍ଷ ଟଙ୍କା ରୋଜଗାର କରିପାରୁଛନ୍ତି। ଏହା ସହ କଠିନ ପ୍ଲାଷ୍ଟିକ ବର୍ଜ୍ୟକୁ ରିସାଇକ୍ଲିଂ ପାଇଁ ପଠାଯାଉଛି।