ଅସହାୟ ତଥା ଭୋକିଲା ପିଲାଙ୍କ ପେଟ ଭରୁଛନ୍ତି ଦିଲ୍ଲୀର ସରିିତା କଶ୍ୟପ। ଅଟୋମୋବାଇଲ ସେଲ୍ସପର୍ସନ ଭାବେ ସରିତା ୧୭ ବର୍ଷ କାର୍ଯ୍ୟ କରି ୨୦୧୯ରେ ତାହାକୁ ଛାଡି ଅସହାୟ ପିଲାମାନଙ୍କୁ ଖାଇବାକୁ ଦେଉଛନ୍ତି। ସେ ଏଥିପାଇଁ ଏକ ରାଜମା ଚାଓ୍ବଲ ଷ୍ଟଲ୍ ଖୋଲିଛନ୍ତି। କଶ୍ୟପ ରହୁଛନ୍ତି ମିରାବାଗ୍ରେ । ସେ ସ୍କୁଟର୍ରେ ଖାଦ୍ୟ ନେଇ ପିରଗଡି ବସ୍ ଷ୍ଟାଣ୍ଡ୍ରେ ଥିବା ତାଙ୍କ ଷ୍ଟଲ୍ରେ ପିଲାଙ୍କୁ ଦେଉଛନ୍ତି। ସ୍କୁଟର୍ରେ ଖାଦ୍ୟ ରଖିତ୍ବା ଲାଗି କ୍ୟାରିୟର ରହିଛି ଓ ଏକ ଛୋଟ ଟେବୁଲ ମଧ୍ୟ ଖଞ୍ଜାଯାଇଛି। କଶ୍ୟପ ସକାଳ ୪ଟାରେ ଉଠନ୍ତି ଓ ୧୦୦ ଜଣଙ୍କ ପାଇଁ ରାଜମା ଚାଓ୍ବଲ, ସାଲାଡ ଏବଂ ଚଟଣି ପ୍ରସ୍ତୁତ କରନ୍ତି। ପାଖାପାଖି ୧୧.୩୦ରେ ସେ ପିରଗଡି ବସ୍୍ଷ୍ଟାଣ୍ଡକୁ ବାହାରି ଯାଆନ୍ତି। ସେଠାରେ ୩-୪ ଟା ଯାଏ ଷ୍ଟଲ୍ ଖୋଲନ୍ତି ଓ ଖାଦ୍ୟ ଲୋକଙ୍କୁ ବିକ୍ରି କରିବା ସହ ନିକଟସ୍ଥ ବସ୍ତି ପିଲାମାନଙ୍କୁ ମାଗଣାରେ ଖାଇବାକୁ ଦିଅନ୍ତି । ପିଲାମାନେ ଗୋଟିଏ ଧାଡିରେ ରହନ୍ତି ଓ ଲୋକମାନେ ରହନ୍ତି ଆଉ ଏକ ଧାଡିରେ । ଲୋକମାନଙ୍କୁ ସେ ଅଧା ପ୍ଲେଟ୍କୁ ୪୦ ଟଙ୍କା ଓ ପୂରା ପ୍ଲେଟ୍କୁ ୬୦ ଟଙ୍କାରେ ବିକ୍ରି କରି ଯାହା ଆୟ କରନ୍ତି ତାହାର ଏକ ମୁଖ୍ୟ ଭାଗ ପିଲାମାନଙ୍କୁ ଦେଉଥିବା ମାଗଣା ଖାଦ୍ୟ ବାବଦରେ ଖର୍ଚ୍ଚ କରନ୍ତି। ସେ ଖାଦ୍ୟର ୬୦ପ୍ରତିଶତ ବିକ୍ରି କରନ୍ତି ଓ ୪୦ପ୍ରତିଶତ ପିଲାମାନଙ୍କୁ ମାଗଣାରେ ଦେଇଥାନ୍ତି। କେବଳ ଏତିକି ନୁହେଁ ସମୟସୁବିଧା ଦେଖି ସେ ଏହି ପିଲାମାନଙ୍କୁ ପାଢ଼ାଉଛନ୍ତି। ଏସବୁ କଷ୍ଟ ହେଲେ ମଧ୍ୟ ପିଲାମାନଙ୍କ ଭବିଷ୍ୟତ ଗଢ଼ିବାକୁ ଚାହାନ୍ତି ବୋଲି କହନ୍ତି କଶ୍ୟପ।