ଭାରତୀୟ ବନ ସେବା ଅଧିକାରୀ ପ୍ରସାଦ ରାଓ ପ୍ଲାଷ୍ଟିକ ମୁକ୍ତ ପରିବେଶ ଲାଗି ଅଣ୍ଟା ଭିଡ଼ିବା ସହ ଆଦିବାସୀଙ୍କୁ ଆମତ୍ନିର୍ଭରଶୀଳ କରାଇବାରେ ବି ସଫଳ ହୋଇଛନ୍ତି। ତ୍ରିପୁରାର ୨୩୯୭ ବର୍ଗକିଲୋମିଟର ଜଙ୍ଗଲରୁ ଜାତୀୟ ବାଉଁଶ ଉତ୍ପାଦନର ୨୮ ପ୍ରତିଶତ ହିଁ ମିଳିଥାଏ। ଏଣୁ ରାଓ ଏଠାକାର ବାଉଁଶକୁ ଉପଯୋଗ କରି ବାଉଁଶ ବୋତଲ ତିଆରି କରୁଛନ୍ତି। ସ୍ଥାନୀୟ ଆଦିବାସୀମାନଙ୍କୁ ସେ ଏହି କାର୍ଯ୍ୟରେ ଲଗାଇଛନ୍ତି। ଅଗରତାଲାର ବାମ୍ବୋ ଆଣ୍ଡ୍ କେନ୍ ଡେଭେଲପ୍ମେଣ୍ଟ ଇନ୍ଷ୍ଟିଚ୍ୟୁଟ୍( ବିସିଡିଆଇ) ଏବଂ ଫରେଷ୍ଟ ରିସର୍ଚ୍ଚ ସେଣ୍ଟର୍ ଅଫ୍ ଲାଇଫ୍ହୁଡ୍ ଏକ୍ସଟେନ୍ଶନ ସଂସ୍ଥା ସହଯୋଗରେ ସେ ଏହି କାର୍ଯ୍ୟ କରୁଛନ୍ତି। ଏବେ ତ୍ରିପୁରା ରିହାବିଲିଟେଶନ ପ୍ଲାଣ୍ଟେଶନ କର୍ପୋରେଶନ ଲିମିଟେଡ୍ର ପରିଚାଳନା ନିର୍ଦ୍ଦେଶକ ଥିବା ପ୍ରସାଦ ରାଓ ଏହା ଲାଗି ୧୦୦୦ ଆଦିବାସୀ କାରିଗରଙ୍କୁ ପ୍ରଧାନମନ୍ତ୍ରୀ ବନ ଧନ ଯୋଜନାରେ ପ୍ରଶିକ୍ଷଣ ଦେଇଛନ୍ତି। ବାଉଁଶରେ କବକ ବୃଦ୍ଧି ପାଇବାର ଆଶଙ୍କା ରହିଥିବାରୁ ବୋତଲର ଭିତର ପାଖରେ କପର ରହୁଛି। ଏହା ମଧ୍ୟ ଭୂତାଣୁ ପ୍ରତିରୋଧୀ ହୋଇପାରିଛି। ୩୦୦ଏମ୍ଏଲ୍, ୫୦୦ଏମ୍ଏଲ୍ ଓ ୭୫୦ ଏମ୍ଏଲ ଏବଂ ୧୦୦୦ଏମ୍ଏଲ୍ ସାଇଜ୍ର ଏହି ବୋତଲ ତିଆରି କରାଯାଉଛି।