କଶ୍ମୀରରେ କେବଳ ଗୁଳିଗୋଳାର ଶବ୍ଦ ଶୁଭୁନାହିଁ, ଶୁଭୁଛି ଶିକ୍ଷାର ସ୍ବର। ଭିନ୍ନ ଉପାୟରେ ପିଲାମାନଙ୍କୁ ଶିକ୍ଷା ପ୍ରତି ଆକୃଷ୍ଟ କରିପାରିଛନ୍ତି ରୁହି ସୁଲତାନ। ସେ ଶ୍ରୀନଗରର କାଶିପୋରାସ୍ଥିତ ବଏଜ ମିଡଲ ସ୍କୁଲର ଶିକ୍ଷୟିତ୍ରୀ ରହିଛନ୍ତି। ବୟସ ୪୭। ସେ ଊର୍ଦ୍ଦୁ ଓ କଶ୍ମୀର ଭାଷାରେ ସ୍ନାତକ ଡିଗ୍ରୀ ହାସଲ କରିଛନ୍ତି। ସେ ଗରିବ ଗୁଜ୍ଜର ଓ କୈବର୍ତ୍ତ ସମ୍ପ୍ରଦାୟର ପିଲାମାନଙ୍କୁ ଶିକ୍ଷା ଦେବା ଲାଗି ଭିନ୍ନ ଧରଣର ଶିକ୍ଷା ଉପକରଣ ପ୍ରସ୍ତୁତ କରିଛନ୍ତି। ସାବୁନ ଖୋଳ, ଆମ୍ବ ଟାକୁଆ, ପ୍ଲାଷ୍ଟିକ୍ ବୋତଲ, ଖାଲିଥିତ୍ବା ଟେଟ୍ରାପ୍ୟାକ ଏପରି କି ଥର୍ମକୁଲ ପ୍ୟାକିଂ ମ୍ୟାଟେରିଆଲରୁ ଏହି ସବୁ ଉପକରଣ ପ୍ରସ୍ତୁତ କରୁଛନ୍ତି। ଏହା ମାଧ୍ୟମରେ ସେ ପିଲାମାନଙ୍କୁ ପଢାଉଛନ୍ତି। ଏହି ସବୁ ବର୍ଜ୍ୟ ଜିନିଷ ବିଭିନ୍ନ ଦୋକାନରୁ ସଂଗ୍ରହ କରୁଛନ୍ତି। ସେ କଲିଗ୍ରାଫି ଆର୍ଟିଷ୍ଟ ହୋଇଥିବାରୁ ବର୍ଜ୍ୟକୁ ଉପଯୋଗ କରି ବିଭିନ୍ନ ଆକର୍ଷଣୀୟ ଉପକରଣ ତିଆରି କରୁଛନ୍ତି, ଯାହା ପ୍ରତି ପିଲାମାନେ ଆକୃଷ୍ଟ ହୋଇ ସ୍କୁଲ ଆସୁଛନ୍ତି। ପ୍ଲାଷ୍ଟିକ ବୋତଲକୁ ରଙ୍ଗାଇ ଏକ ଅକ୍ଷର ଭଳି କରି ପିଲାଙ୍କୁ ବୁଝାଉଛନ୍ତି। ସାବୁନ ଖୋଳ ବ୍ୟବହାର କରି ଗଣିତ ପଢ଼ାଉଛନ୍ତି। ରଙ୍ଗର ଧାରଣା ଦେବାକୁ ଯାଇ ଆମ୍ବ ଟାକୁଆକୁ ବିଭିନ୍ନ ରଙ୍ଗରେ ରଙ୍ଗାଉଛନ୍ତି। ରୁହିଙ୍କ ଏହି ଶିକ୍ଷା ପଦ୍ଧତିକୁ ଅନ୍ୟ ଶିକ୍ଷକମାନେ ବି ଅନୁକରଣ କରିବା ଆରମ୍ଭ କରି ପଢ଼ାଉଛନ୍ତି। ବହୁ ସମୟରେ ସେ ପିଲାମାନଙ୍କ ଘରକୁ ଯାଇ ପଢ଼ାଉଛନ୍ତି।
