ଅବସର ପରେ ବିଶ୍ରାମ ନୁହେଁ ସେବାକୁ ନିଜ ମନ୍ତ୍ର କରିଛନ୍ତି ଡ. ଲୀଲା ଜୋଷୀ। ତାଙ୍କୁ ବର୍ତ୍ତମାନ ବୟସ ୮୨। ରହୁଛନ୍ତି ମଧ୍ୟ୍ୟପ୍ରଦେଶର ରତଲାମରେ। ସେଠାକାର ଆଦିବାସୀ ମହିଳା ଓ ପିଲାମାନଙ୍କ ସେବାରେ ପାଖାପାଖି ୨୩ ବର୍ଷ ହେବ ନିଜକୁ ଉତ୍ସର୍ଗ କରିଛନ୍ତି। ଲୀଲା ରେଲଓ୍ବେରେ ଚିଫ୍ ମେଡିକାଲ ଅଫିସର ଭାବେ କାର୍ଯ୍ୟ କରି ୧୯୯୭ରେ ଅବସର ନେଇ ଆଦିବାସୀ ପିଲା ଓ ମହିଳା ବିଶେଷ କରି ଗର୍ଭବତୀଙ୍କ ଅପପୁଷ୍ଟି ଏବଂ ରକ୍ତହୀନତା ସମସ୍ୟା ଦୂର କରିବାରେ ଲାଗିଛନ୍ତି। ଡ. ଜୋଷୀ ଶ୍ରୀ ସଓ୍ବୋ ସଂସ୍ଥା (ଏସ୍ଏସ୍ଏସ୍) ନାମକ ଏନ୍ଜିଓ ଗଠନ କରି ଜିଲାରେ ମାତୃମୃତ୍ୟୁ ହାର ହ୍ରାସ କରିବାରେ ସକ୍ଷମ ହୋଇଛନ୍ତି। ଦୁଇ ଦଶନ୍ଧି ମଧ୍ୟରେ ୩.୫ ଲକ୍ଷ ପିଲା ଓ ଲକ୍ଷାଧିକ ମହିଳାଙ୍କୁ ସେ ସେବା ଯୋଗାଇ ଦେଇଛନ୍ତି। ଏଥିପାଇଁ ସେ ରତଲାମର ମଦର ଟେରସା ଭାବେ ଜଣାଶୁଣା। ସରକାରୀ ହସ୍ପିଟାଲ, ସ୍ବାସ୍ଥ୍ୟସେବା ବିଭାଗ, ସ୍ବୟଂସହାୟିକା ଗୋଷ୍ଠୀ, ଅଙ୍ଗନଓ୍ବାଡି ଓ ଆଶା କର୍ମୀମାନଙ୍କ ସହଯୋଗରେ ସେବା ଲାଗି ଲୋକବଳ ଓ ଓ୍ୟଷଧ ଯୋଗାଡ କରୁଛନ୍ତି। ସରକାରୀ ସ୍ବାସ୍ଥ୍ୟ କେନ୍ଦ୍ରରେ ମହିଳା ଓ ଶିଶୁମାନଙ୍କ ପାଇଁ ମାଗଣାରେ ମାସକୁ ୨ ଥର ହେଲ୍ଥ କ୍ୟାମ୍ପ୍ ଆୟୋଜନ କରୁଛନ୍ତି। ଏନ୍ଜିଓ ମାଧ୍ୟମରେ ପାଉଡର ପୌଷ୍ଟିକ ଆହାର ବଣ୍ଟନ କରୁଛନ୍ତି। ବିଭିନ୍ନ ଉତ୍ସରୁ ପ୍ରାପ୍ତ ଅନୁଦାନରେ ଏହି ସେବା ଚାଲିଛି ବୋଲି ଡ. ଜୋଷୀ କହନ୍ତି। ଡ. ଜୋଷୀଙ୍କ ଜନ୍ମ ଉତ୍ତରାଖଣ୍ଡରେ। ତାଙ୍କ ପିତା ରେଲଓ୍ବେରେ ଚାକିରି କରିଥିଲେ। ମେଡିକାଲ ଶିକ୍ଷା ଶେଷ କରି ସେ ରେଲଓ୍ବେ ହେଲ୍ଥ ସର୍ଭିସରେ ଯୋଗ ଦେଇ ୧୯୯୭ରେ ଅବସର ନେଇଥିଲେ। ଏହାର ବର୍ଷେ ପୂର୍ବରୁ ମଦର ଟେରେସାଙ୍କ ସହ ଜୋଷୀଙ୍କ ସାକ୍ଷାତ ହେବା ପରେ ତାଙ୍କ ପରାମର୍ଶରେ ରତଲାମରେ ସେ ଆଦିବାସୀଙ୍କ ସେବାରେ ଲାଗିଛନ୍ତି।