ପେସାରେ ଗଣିତ ଶିକ୍ଷକ, ହେଲେ ଆବିଷ୍କାର କରିବାର ନିଶା ତାଙ୍କ ଜୀବନର ଏକ ପ୍ରମୁଖ ଅଙ୍ଗ। ଏମିତି ଜଣେ ଶିକ୍ଷକ ହେଉଛନ୍ତି କଶ୍ମୀରର ବିଲାଲ ଅହମ୍ମଦ। ସେ ୧୩ ବର୍ଷ ପରିଶ୍ରମ କରି ତାଙ୍କ ୧୯୯୮ର ନିଶାନ ମାଇକ୍ରା କାର୍କୁ ଏକ ସୋଲାର୍ କାର୍ କରିପାରିଛନ୍ତି। ଏବେ ଅନେକ ମୋଟର କମ୍ପାନୀ ଇଭି ମଡେଲ କାର୍ ଓ ବାଇକ୍ ନିର୍ମାଣ କରିବାରେ ଲାଗିଥିବାବେଳେ ବିଲାଲ ବହୁ ପୂର୍ବରୁ ଏଭଳି କାର୍ ନିର୍ମାଣ କରିବା ଲାଗି ନିଷ୍ପତ୍ତି ନେଇଥିଲେ। ଏହି କାର୍ ସମ୍ପୂର୍ଣ୍ଣ ଭାବେ ଆଧୁନିକ ଗେଜେଟ୍ ଦ୍ୱାରା ସଞ୍ଚାଳିତ। ଏହାର ପୂରା ବାହାର ଭାଗରେ କଳା ରଙ୍ଗର ସୋଲାର ପ୍ୟାନେଲ ଲଗାଇଛନ୍ତି। ଏହା ଅଧିକ ସୂର୍ଯ୍ୟ କିରଣ ଥିବା ଯେ କୌଣସି ଦିଗକୁ ଆପେ ଆପେ ଘୂରିପାରୁଛି। କଶ୍ମୀରରେ କମ୍ ସୌର କିରଣ ରହୁଥିବାରୁ ବିଶେଷକରି ମନୋକ୍ରିଷ୍ଟାଲାଇନ ସୋଲାର ପ୍ୟାନେଲ ଉପଯୋଗ କରିଛନ୍ତି। କାର୍ଟି ୧ କିଲୋଭୋଲ୍ଟ ମୋଟରରେ ସଞ୍ଚାଳିତ ହେଉଛି ଓ ଏଥିରେ ଏକ ଚାର୍ଜ ହେବା ଭଳି ବ୍ୟାଟେରି ଲଗାଇଛନ୍ତି। ଏହି କାର୍ ନିର୍ମାଣରେ ସେ ୧୫ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ଏହାକୁ ଅଧିକ ସଂଖ୍ୟାରେ ନିର୍ମାଣ କରାଗଲେ ତାହାର ମୂଲ୍ୟ ପାଖାପାଖି ୬ରୁ ୮ ଲକ୍ଷ ଟଙ୍କା ହେବ ବୋଲି କହନ୍ତି ବିଲାଲ। କେବଳ ଏତିକି ନୁହେଁ ବିଲାଲ ମଧ୍ୟ ୨୦୦୯ରେ ଏଲ୍ପିଜି ନିୟନ୍ତ୍ରଣ ସୁରକ୍ଷା ଉପକରଣ ନିର୍ମାଣ କରିଛନ୍ତି। ଗ୍ୟାସ୍ର ରେଗୁଲେଟର ବନ୍ଦ କରିବାକୁ ଭୁଲି ଯାଇଥିଲେ ବି ତାଙ୍କ ଦ୍ୱାରା ନିର୍ମିତ ଏଲ୍ପିଜି କଣ୍ଟ୍ରୋଲ ଡିଭାଇସ ଗ୍ୟାସ୍କୁ ବନ୍ଦ କରିପାରୁଛି।