ଫଳ ବଗିଚାଟିଏ ଥିଲେ ତା’ଉପରେ ସମସ୍ତଙ୍କର ଆଖି ଥାଏ। ଫଳ ଲୋଭରେ ଅନେକେ ସୁଯୋଗ ଦେଖି ବଗିଚାରୁ ଚୋରି କରିବାକୁ ଭୁଲନ୍ତି ନାହିଁ, ଯେଉଁଥିପାଇଁ ଏକ ଆମ୍ବବଗିଚାକୁ ମଣିଷଙ୍କ ସହ କୁକୁରମାନଙ୍କୁ ଜଗୁଆଳି ଭାବେ ରଖାଯାଇଛି। ଏଭଳି ଏକ ବଗିଚା ଦେଖିବାକୁ ମିଳେ ମଧ୍ୟପ୍ରଦେଶର ଜବଲପୁରରେ। ଏହାର ମାଲିକ ହେଉଛନ୍ତି ସଙ୍କଳ୍ପ ସିଂ ପରିହାର। ବଗିଚାରେ ଦେଶ ବିଦେଶର ବହୁ ମୂଲ୍ୟବାନ୍ ଓ ସୁସ୍ବାଦୁ ଆମ୍ବ ଫଳୁଥିବାରୁ ସେ ଚୋରି ରୋକିବା ଲାଗି ଏଭଳି ସୁରକ୍ଷା ବ୍ୟବସ୍ଥା କରିଛନ୍ତି। କଥା ହେଉଛି, ୪୭ ବର୍ଷୀୟ ପରିହାରଙ୍କ ୪ ଏକର ବିଶିଷ୍ଟ ବଗିଚାରେ ୨୪ଟି ଦୁର୍ଲ୍ଲଭ କିସମର ୧ ହଜାରରୁ ଊର୍ଦ୍ଧ୍ୱ ଆମ୍ବଗଛ ଲଗାଯାଇଛି। ୮ଟି କିସମର ଚାରା ସେ ବିଦେଶରୁ ଯୋଗାଡ଼ କରିଥିତ୍ଲେ। ଏଥିରେ ମଲ୍ଲିକା ଓ ମିୟାଜାକୀର ଚାହିଦା ଢେର ବେଶି। ମିୟାଜାକୀ କିସମର ଆମ୍ବ କେଜି ପ୍ରତି ୧ ହଜାର ଟଙ୍କାରେ ବିକ୍ରି କରୁଛନ୍ତି ପରିହାର। ବଗିଚାରେ ଉନ୍ନତ କିସମର ଆମ୍ବ ଫଳୁଥିବାରୁ ବାହାରୁ ଲୋକେ ଏହାକୁ ଦେଖିବାକୁ ଆସୁଛନ୍ତି। ଏଥିପାଇଁ ବଗିଚା ଭିତରେ ଲୋକେ କିଭଳି ଭଲରେ ଭୋଜିକରି ସମୟ କଟାଇବେ ତାହାର ମଧ୍ୟ ବ୍ୟବସ୍ଥା କରାଯାଇଛି। ଲୋକମାନଙ୍କୁ ବିଭିନ୍ନ ଆମ୍ବ ଗଛ ଦେଖାଇବା ପାଇଁ ଗାଇଡ୍ ଭାବେ ସେ ଲୋକଙ୍କୁ ନିଯୁକ୍ତ କରିଛନ୍ତି।