୧୯୮୪ରେ ଆସାମର ଗୋପୀନାଥ ଶର୍ମା ଆରମ୍ଭ କରିଥିବା ଛୋଟ ନର୍ସରିଟି ଏବେ ସାରା ଦେଶରେ ଏକ ନୂତନ ପରିଚୟ ସୃଷ୍ଟି କରିପାରିଛି। ଗୋପୀନାଥ ଗୁଆହାଟୀରୁ ୩୦ କି.ମି. ଦୂର ଧୁପଗୁରୀର ଏକ ସ୍କୁଲରେ ପ୍ରିନ୍ସିପାଲ ଥିବାବେଳେ ଗଛ ଲଗାଇବା ସହ ନର୍ସରି ଖୋଲି ଲୋକମାନଙ୍କୁ ଗଛ ଦେଉଥିଲେ। ୩୮ ବର୍ଷ ପୂର୍ବେ ଗୋପୀନାଥ ଆରମ୍ଭ କରିଥିବା ନର୍ସରି ଏବେ ପ୍ରସିଦ୍ଧ ଡାଫୋଡିଲ ନର୍ସରି ଭାବେ ପରିଚିତ। ଗୋପୀନାଥଙ୍କ ପୁଅ ଧ୍ରୁବଜ୍ୟୋତି ଗୁଆହାଟୀ ଡିମୋରିଆ କଲେଜରେ ଜୀବ ବିଜ୍ଞାନ ବିଭାଗର ମୁଖ୍ୟ ରହି ଉକ୍ତ ନର୍ସରିର ଦାୟିତ୍ୱ ମଧ୍ୟ ବୁଝୁଛନ୍ତି। ଏଥିରେ ତାଙ୍କ ସ୍ତ୍ରୀ ରେଖା ସହଯୋଗ କରୁଛନ୍ତି। ଏହି ନର୍ସରି ଉତ୍ତରପୂର୍ବାଞ୍ଚଳରେ ସବୁଠୁ ବଡ଼। ଏଥିରେ ୧୦,୦୦୦ରୁ ଊର୍ଦ୍ଧ୍ୱ ଗଛ ରହିଛି। ବେକଳ ଏତିକି ନୁହେଁ ଧ୍ରୁବଜ୍ୟୋତି ମଧ୍ୟ ଡାଫୋଡିଲ କଲେଜ ଅଫ୍ ନର୍ସରି ଖୋଲିଛନ୍ତି। ଏହା ସହ ଭାରତ ସରକାରଙ୍କ କିଛି ପ୍ରୋଜେକ୍ଟ ଯୋଡ଼ି ହୋଇଛି। ଉକ୍ତ ନର୍ସରିରେ ୭୦୦ରୁ ଅଧିକ ମଦର ପ୍ଲାଣ୍ଟ ରହିଛି। ଏହା ବ୍ୟତୀତ ୪୦୦୦ରୁ ଊର୍ଦ୍ଧ୍ୱ କିସମର ଫୁଲ, ଫଳ, ଔଷଧୀୟ ଏବଂ ଶୋଭାବର୍ଦ୍ଧକ ଗଛ ଶୋଭା ପାଉଛି। ନର୍ସରିରେ ୩୦୦ ଲୋକଙ୍କୁ ନିଯୁକ୍ତ କରାଯାଇଛି। ଧ୍ରୁବଜ୍ୟୋତି ତାଙ୍କ ଘରେ ହର୍ଟିକଲ୍ଚର ସମ୍ପର୍କିତ ୫ରୁ ୭ ହଜାର ବହି ରଖିଛନ୍ତି। ଏହି ନର୍ସରି ଏବେ ପର୍ଯ୍ୟଟକଙ୍କ ଆକର୍ଷଣ କେନ୍ଦ୍ରବିନ୍ଦୁ ପାଲଟିଛି। ପ୍ରତିଦିନ ଏଠାକୁ ୨୦୦ରୁ ୩୦୦ ଲୋକ ବୁଲିବାକୁ ଆସୁଛନ୍ତି। ଧ୍ରୁବଜ୍ୟୋତି ୬୦୦ ଲୋକଙ୍କୁ ନର୍ସରି ଖୋଲିବା ଲାଗି ସାହାଯ୍ୟ କରିଛନ୍ତି।