ଲୋକଙ୍କ ସେବା ନିକଟରେ ଚାକିରି ମୂଲ୍ୟ କିଛି ନୁହେଁ, ଯାହା ପ୍ରମାଣ କରିଛନ୍ତି ତାମିଲନାଡୁର ନିମଲ ରାଘବନ। ୩୫ ବର୍ଷୀୟ ନିମଲ ଦୁବାଇରେ ସଫ୍ଟଓ୍ବେର ଡେଭଲପର ଭାବେ କାର୍ଯ୍ୟ କରୁଥିଲେ। ୨୦୧୮ରେ ଗାଜା ବାତ୍ୟା ପରେ ସେ ନିଜଗାଁ ନଦିୟାମକୁ ଫେରି କାବେରି ଡେଲ୍ଟାର ଦୁର୍ଦ୍ଦଶା ଦେଖି ଆଉ ଦୁବାଇ ଫେରିବାକୁ ଚାହଁି ନ ଥିଲେ। ପରେ ଚାକିରି ଛାଡ଼ି ଡେଲ୍ଟାର ଗାଁଗୁଡ଼ିକରେ ପରିବର୍ତ୍ତନ ଆଣିବାରେ ଲାଗିଛନ୍ତି। ୩୨ ଲକ୍ଷ ଟଙ୍କା ଖର୍ଚ୍ଚ କରି ସେ ପେରାଭୁରାନି ହ୍ରଦର ପୁନରୁଦ୍ଧାର କରିଛନ୍ତି, ଯାହାଦ୍ୱାରା ୬,୦୦୦ ଏକର ଜମିରେ ଭଲ ଚାଷ ହୋଇପାରୁଛି ।
ଏହା ବ୍ୟତୀତ ତାମିଲନାଡୁର ବିଭିନ୍ନ ଅଞ୍ଚଳରେ ୧୧୮ଟି ଜଳାଶୟର ପୁନରୁଦ୍ଧାର କରିସାରିଲେଣି ଓ ଏହା ଦ୍ୱାରା ୪୦ ଲକ୍ଷ ଲୋକ ଉପକୃତ ହୋଇ ପାରିଛନ୍ତି। ଏହାସହ କାବେରି ଡେଲ୍ଟାରେ ୨୫,୦୦୦ ଗଛ ଲଗାଇ ସାରିଲେଣି। ପ୍ରଥମରେ ସେ ସୋସିଆଲ ମିଡିଆରେ ‘ବାଉନ୍ସ ବ୍ୟାକ ଡେଲ୍ଟା’ ଅଭିଯାନ ଆରମ୍ଭ କରି ବାତ୍ୟା ପୀଡ଼ିତଙ୍କ ପାଇଁ ଅତ୍ୟାବଶ୍ୟକ ଖାଦ୍ୟ ସାମଗ୍ରୀ, ପୋଷାକ ଓ ଅର୍ଥ ଆଦି ଯୋଗାଡ଼ କରିଥିଲେ। ସେବେଠାରୁ ତାଙ୍କର ମହତ୍ତ୍ୱାକାଂକ୍ଷୀ କାର୍ଯ୍ୟ ସହ ବହୁ ସ୍ବେଚ୍ଛାସେବୀ ଯୋଗ ଦେଇ ସେମାନଙ୍କ ସେବା ଜାରି ରଖିଛନ୍ତି।