ବହୁ ସମୟରେ ସମସ୍ୟା ନୂଆ ବାଟ ଦେଖାଇଥାଏ ଓ ସମ୍ମିଳିତ ପ୍ରୟାସରେ ସଫଳତା ହାସଲ ହୋଇଥାଏ। ଏ ଦୁଇଟିର ଦୃଷ୍ଟାନ୍ତ ଦେଖିବାକୁ ମିଳିଛି ଛତିଶଗଡ଼ର କୱାର୍ଦ୍ଧା(କବୀରଧାମ)ରେ । ସ୍ଥାନୀୟ ଲୋକଙ୍କୁ ରାଶନ ଲାଗି ବୁଲି ବୁଲି ୧୨ କିଲୋମିଟର ଯାତ୍ରା କରିବାକୁ ପଡୁଥିଲା ଓ ଏହି ସମସ୍ୟା ଦୂର କରିବା ଲାଗି ସେମାନେ ଏକାଠି ହୋଇ ପାହାଡ଼ କାଟି ରାସ୍ତା ତିଆରି କରିଛନ୍ତି। ଏବେ ନୂଆ ରାସ୍ତା ଯୋଗୁ ଏହି ଦୂରତା ମାତ୍ର ଦୁଇ କିଲୋମିଟରକୁ ଖସି ଆସିଛି । ବିଶେଷ କଥା ହେଉଛି ୪ଟି ଗ୍ରାମର ଗ୍ରାମବାସୀ ମିଳିତ ଭାବେ ୩୦ ଫୁଟ୍ ଉଚ୍ଚ ପାହାଡ଼ କାଟି ରାସ୍ତା ନିର୍ମାଣ କରିଛନ୍ତି। ସେମାନେ ଯେଉଁ ପାହାଡ଼କୁ କାଟି ରାସ୍ତା ତିଆରି କରିଛନ୍ତି ତା’ ଆରପାଖେ ବାହପାନି ଗାଁ, ଯେଉଁଠାରେ ରହିଛି ସରକାରୀ ରାଶନ ଦୋକାନ । ତେବେ କାନଖେରା, ଧରାପାନୀ, ମହାରାଣୀ ଟୋଲା ଏବଂ ଥେଙ୍ଗାଟୋଲା ଗ୍ରାମ ଏହାର ନିମ୍ନ ଅଞ୍ଚଳରେ ଅବସ୍ଥିତ। ଏହି ୪ଟି ଗାଁର ଲୋକେ ୧୨ କିଲୋମିଟର ଯାଇ ରାଶନ ଦୋକାନରୁ ଖାଦ୍ୟ ସାମଗ୍ରୀ ମୁଣ୍ଡାଇ ଆଣୁଥିଲେ। ଉକ୍ତ ସମସ୍ୟା ସମାଧାନ ପାଇଁ ଚାରି ଗାଁର ଲୋକମାନେ ଏକ ସଭା କରି କାନଖେରା ଗ୍ରାମକୁ ଲାଗିଥିବା ଡୋଙ୍ଗର ପାହାଡ଼ କାଟି ରାସ୍ତା ତିଆରି କରିବାକୁ ନିଷ୍ପତ୍ତି ନେଇଥିଲେ। ଏଥିରେ ଚାରୋଟି ଗାଁର ୭୦ ଜଣ ଗ୍ରାମବାସୀ କାମ ଆରମ୍ଭ କରି ୮ ଦିନର କଠିନ ପରିଶ୍ରମ ପରେ ପର୍ବତ କାଟି ଦୁଇ କିଲୋମିଟର ରାସ୍ତା ନିର୍ମାଣ କରିଥିଲେ।