ଜଣେ ସ୍କୁଲ ପ୍ରିନ୍ସିପାଲଙ୍କ ଅଭିନବ ଶିକ୍ଷା ପଦ୍ଧତି କୋଭିଡ୍ ମହାମାରୀ ସମୟରେ ପିଲାମାନଙ୍କୁ ପଢ଼ାଇବାରେ ସହାୟକ ହେବା ସହ ଏବେ ତାହା ସେମାନଙ୍କ ଅଭିଭାବକଙ୍କୁ ମଧ୍ୟ ସାକ୍ଷର କରିପାରିଛି। ଝାଡ଼ଖଣ୍ଡ ଡୁମରର ଡୁମାର୍ଥର ଉତ୍କ୍ରମିତ ମଧ୍ୟବିଦ୍ୟାଳୟର ପ୍ରିନ୍ସିପାଲ ଡ. ସପନ ପତ୍ରଲେଖ ୨୦୨୦ରେ ଲକ୍ଡାଉନ ହେବା ପରେ ଡୁମାର୍ଥର ଗାଁର ପିଲାମାନଙ୍କ ପାଖରେ ମୋବାଇଲ ନ ଥିବାରୁ ସେମାନଙ୍କୁ ପଢ଼ାଇବା ଲାଗି ‘ବ୍ଲାକବୋର୍ଡ ମଡେଲ’ ଆପଣାଇଥିଲେ। ଅନ୍ଲାଇନରେ ପିଲାମାନେ ପଢ଼ି ନ ପାରିଲେ ସେମାନେ ସ୍କୁଲ ଛାଡ଼ି ଦେବା ଆଶଙ୍କା ପ୍ରକାଶ କରି ଡ. ସପନ ଏହି ପଦ୍ଧତି ଆରମ୍ଭ କରିଥିଲେ। ଏଥିରେ ସେ ପିଲାଙ୍କ ମାଟିଘର କାନ୍ଥରେ ବ୍ଲାକ୍ବୋର୍ଡ କରିବା ସହ ସେଥିରେ ପିଲାମାନଙ୍କୁ ପଢ଼ାଇଥିଲେ। ୨୦୨୦ରୁ ୨୦୨୨ ଯାଏ ସେ ଏହି ପଦ୍ଧତିରେ ପଢ଼ାଇଛନ୍ତି। ଫେବୃୟାରୀ ୨୦୨୨ରେ ସ୍କୁଲ ଖୋଲିବା ପରେ ପିଲାମାନେ ସ୍କୁଲକୁ ଆସିଲେ। ହେଲେ ସେହି ବ୍ଲାକବୋର୍ଡରେ ଏବେ ପିଲାମାନେ ସେମାନଙ୍କ ଅଭିଭାବକ, ଜେଜେବାପା ଓ ଜେଜେ ମା’ଙ୍କୁ ପଢ଼ାଉଛନ୍ତି। ଏବେ ଗାଁର ନିରକ୍ଷର ସାକ୍ଷର ହୋଇଯାଇଛନ୍ତି।