ଛତିଶଗଡ଼କୁ ମାତା କୌଶଲ୍ୟାଙ୍କ ସହର କୁହାଯାଏ। ଏହା ମଧ୍ୟ ଭଗବାନ ଶ୍ରୀରାମଙ୍କ ଆଈଙ୍କ ଘର। ଶ୍ରୀରାମଙ୍କ ଆଈଙ୍କ ଘରେ ରାମଙ୍କ ଭକ୍ତ ପ୍ରଭୁ ହନୁମାନଙ୍କ ପାଇଁ ଏକ ନୋଟିସ ଜାରି କରାଯାଇଛି। ବଜରଙ୍ଗବାଲିଙ୍କୁ ଏହି ନୋଟିସ ରାୟଗଡ଼ ନଗର ନିଗମ ପକ୍ଷରୁ ପଠାଯାଇଛି। ୱାର୍ଡ ନମ୍ବର-୧୮ ଟିକରାପାରରେ ପ୍ରଭୁ ହନୁମାନଙ୍କ ମନ୍ଦିର ରହିଛି। ପ୍ରଶାସନ ପକ୍ଷରୁ ଜଳକର ନୋଟିସ ଜାରି କରାଯାଇ ପୈଠ ପାଇଁ ୧୫ ଦିନର ଅନୁଗ୍ରହ ଅବଧି ଦିଆଯାଇଛି। ଅଫିସକୁ ହନୁମାନଜୀଙ୍କୁ ଡକାଯାଇଛି। ଯଦି ସେ ଅଫିସକୁ ନ ଆସନ୍ତି ତେବେ ସର୍ଚାର୍ଜ ଆଦାୟ ପାଇଁ ଏକ ଚେତାବନୀ ଦିଆଯାଇଛି। ପ୍ରଭୁ ହନୁମାନଙ୍କୁ ନୋଟିସ ଜାରି ହୋଇଥିବା ଖବରକୁ ନେଇ ଚର୍ଚ୍ଚା ଆରମ୍ଭ ହୋଇଛି। ରାୟଗଡ଼ ମ୍ୟୁନିସିପାଲିଟି କର୍ପୋରେଶନ ବଜରଙ୍ଗବାଲିଙ୍କୁ ୪୦୦ଟଙ୍କାର ଜଳ କର ଶୀଘ୍ର ପୈଠ କରିବାକୁ କହିଛିି।
ମନ୍ଦିର ପ୍ରଶାସନ ପକ୍ଷରୁ କିଛି ବ୍ୟକ୍ତିଙ୍କ ନାମରେ ଏହି ନୋଟିସ ଜାରି କରାଯାଉଥିଲା, କିନ୍ତୁ ନିଗମର କର୍ମଚାରୀମାନେ ପ୍ରଭୁ ହନୁମାନଙ୍କୁ ସେମାନଙ୍କ ଗ୍ରାହକ ଭାବରେ ବିବେଚନା କରି ଏଭଳି କରିଛନ୍ତି। ଭୁଲ ଜଣାପଡ଼ିବା ପରେ କର୍ପୋରେଶନ ପ୍ରଶାସନ ନୋଟିସରେ ସଂଶୋଧନ କରିବାକୁ କହିଛି। କେବଳ ଏତିକି ନୁହେଁ, କିଛିଦିନ ତଳେ ରାୟଗଡ ଜିଲାର ଅତିରିକ୍ତ ତହସିଲଦାର ବିକ୍ରାନ୍ତ ସିଂ ଠାକୁର ଜମି ଜବରଦଖଲ ନେଇ ପ୍ରଭୁ ଶଙ୍କରଙ୍କ ସମେତ ୧୦ଜଣଙ୍କ ବିରୋଧରେ ନୋଟିସ ଜାରି କରିଥିଲେ। ଶୁଣାଣିରେ ହାଜର ନ ହେଲେ ୧୦ ହଜାର ଟଙ୍କାର ଜରିମାନା ଦଣ୍ଡାଦେଶ ଲାଗି ଚେତାବନୀ ଦିଆଯାଇଥିଲା। ଏନେଇ ବିବାଦ ସୃଷ୍ଟି ହେବା ପରେ ଜିଲା ପ୍ରଶାସନ ନିଜର ଭୁଲମାନି ଏହାକୁ ସୁଧାର କରିଥିଲା।