‘ଯାହାକୁ ରଖିବେ ଅନନ୍ତ, କି କରିପାରେ ବଳବନ୍ତ’ ଭାଗବତର ଏହି ଉକ୍ତିଟିର ଯଥାର୍ଥତା ପ୍ରତିପାଦିତ ହୋଇଛି ଜଣେ ୮ ବର୍ଷର ବାଳକଙ୍କ କ୍ଷେତ୍ରରେ। ଛତିଶଗଡ଼ର ଜସପୁର ଜିଲାରେ ଘଟିଥିବା ଏକ ଆଶ୍ଚର୍ଯ୍ୟଜନକ ଘଟଣା କ୍ରମରେ ୮ ବର୍ଷ ବୟସ୍କ ଦୀପକଙ୍କୁ ଏକ ବିଷଧର ସାପ କାମୁଡ଼ିବା ପରେ ବାଳକ ଜଣକ ସାପକୁ ଦୁଇଥର କାମୁଡ଼ିବା ଯୋଗୁ ସାପର ମୃତ୍ୟୁ ଘଟିଛି ଓ ବାଳକ ଜଣଙ୍କ ବଞ୍ଚିଯାଇଛନ୍ତି। ଦୀପକ ଖେଳୁଥିବାବେଳେ ଏକ ସାପ ଆସି ତାଙ୍କ ହାତରେ ଗୁଡ଼ାଇ ହୋଇ ତାଙ୍କୁ କାମୁଡ଼ିଥିଲା। ସେ ଯନ୍ତ୍ରଣାରେ କାନ୍ଦିବାକୁ ଆରମ୍ଭ କଲେ ମଧ୍ୟ ସାପକୁ ହାତରୁ ବାହାର କରିପାରି ନ ଥିଲେ। ସେ ଜୀବନ ବଞ୍ଚାଇବାକୁ ଯାଇ ସାହସର ସହିତ ସାପକୁ ଦୁଇଥର କାମୁଡ଼ି ଦେବାରୁ ସାପଟିର ମୃତ୍ୟୁ ଘଟିଥିଲା। ସାପ କାମୁଡ଼ିବା ବିଷୟ ଦୀପକ ପରିବାର ଲୋକଙ୍କୁ ଜଣାଇବା ପରେ ତାଙ୍କୁ ନିକଟସ୍ଥ ଡାକ୍ତରଖାନାକୁ ନିଆଯାଇଥିଲା। ଦୀପକଙ୍କୁ ଆଣ୍ଟି ଭେନମ ଇଞ୍ଜେକ୍ଶନ ଦିଆଯାଇଥିଲା। ଡାକ୍ତରମାନେ କହିଥିଲେ ଯେ, ସାପଟି ଡ୍ରାଏ ବାଇଟ୍ କରିଥିଲା, ଅର୍ଥାତ୍ ଯେତେବେଳେ ସାପ ଦୀପକକୁ ଦଂଶନ କଲା, ସେତେବେଳେ ବିଷ ବାହାରି ନ ଥିଲା, ଯେଉଁଥିପାଇଁ ଦୀପକଙ୍କର ଜୀବନ ବଞ୍ଚିଗଲା।