ଆଗାମୀ ୫୦ ବର୍ଷରେ ଜଳ ସଙ୍କଟ ଉତ୍କଟ ହେବା ସହ ଏହା ଜୀବଜଗତକୁ ପ୍ରଭାବିତ କରିବ। ସେଥିପାଇଁ ଆଗାମୀ ଦିନରେ ଏକ ଜଳ ଯୁଦ୍ଧ ହେବ ବୋଲି ଆଶଙ୍କା ପ୍ରକାଶ ପାଇଛି। ଏ କଥାକୁ କିଏ ଗମ୍ଭୀରତାର ସହ ନିଅନ୍ତୁ ବା ନ ନିଅନ୍ତୁୁ, କେରଳର ଷ୍ଟାନ୍ଲେ ଜାକବ୍ ଏହା ଉପରେ ଗଭୀର ଚିନ୍ତା କରିଛନ୍ତି। ସେ ପାନୀୟ ଜଳ ପାଇଁ ଏକ ଫିଲଟର ନିର୍ମାଣ କରିଛନ୍ତି; ଯାହା ବିନା ବିଦ୍ୟୁତ୍ରେ ମଇଳା ପାଣିକୁ ଫିଲଟର କରି ପାନୀୟ ଉପଯୋଗୀ କରିପାରୁଛି। ଏପରି କି ଏଥିରେ ବ୍ୟାଟେରି ଆବଶ୍ୟକ ହେଉନାହିଁ। ଏହି ଫିଲ୍ଟରରେ ବିଭିନ୍ନ ପ୍ରକାର ପ୍ରାକୃତିକ ଷ୍ଟୋନ୍ ଖଞ୍ଜାଯାଇଛି ଯାହା ପାଣିକୁ ସ୍ବଚ୍ଛ କରିବା ସହ ବ୍ୟାକ୍ଟେରିଆ, ଭୂତାଣୁ, ଫଙ୍ଗସ ଆଦି ଶେଷ କରିପାରୁଛି। ଏହାକୁ କ୍ଷୁଦ୍ର, ମଧ୍ୟମ ଓ ବଡ଼ ଆକାରରେ ନିର୍ମାଣ କରାଯାଇଛି। ବଡ଼ ଫିଲ୍ଟରଗୁଡ଼ିକୁ ବ୍ୟବସାୟିକ ଉଦ୍ଦେଶ୍ୟରେ ବ୍ୟବହାର କରାଯାଇପାରିବ ବୋଲି କହନ୍ତି ଜାକୋବ। ଏବେ ସୁଦ୍ଧା ସେ ୫୦୦ ଫିଲଟର ବିକ୍ରି କରିସାରିଲେଣି। ଜାକୋବ ରହନ୍ତି ଏର୍ନାକୁଲମ୍ର କୋଥାଡ ଜିଲାରେ। ଏହି ଅଞ୍ଚଳରେ ସ୍ବଚ୍ଛ ପାଣି ଉପଲବ୍ଧ ହୁଏ ନାହିଁ। ପିଇବା ପାଣି ତ ଦୂରର କଥା; ଗାଧୋଇବା, ପୋଷାକ କିମ୍ବା ବାସନ ସଫା କରିବା ପାଇଁ ମଧ୍ୟ ସ୍ବଚ୍ଛ ପାଣି ମିଳେନାହିଁ। ଏଭଳି ସମସ୍ୟା ଟାଳିବା ପାଇଁ ଜାକୋବ ନିଜସ୍ବ ଉଦ୍ୟମରେ ଏହି ଫିଲଟର ନିର୍ମାଣ କରିବାକୁ ନିଷ୍ପତ୍ତି ନେଇ ସଫଳତା ପାଇପାରିଛନ୍ତି। ଏହା ସ୍ବଚ୍ଛ ପାଣି ଉପଲବ୍ଧ ହେଉ ନ ଥିବା ଦୁର୍ଗମ ଅଞ୍ଚଳରେ ଲୋକମାନଙ୍କ କାମରେ ଆସିବା ସହ ସ୍ବାସ୍ଥ୍ୟ କ୍ଷେତ୍ରରେ ପରିବର୍ତ୍ତନ ଆଣିବାରେ ସହାୟକ ହେବ ବୋଲି କହନ୍ତି ଜାକୋବ।