କେରଳର ଏକ ସଂଗଠନ ନାନ୍ମା ମାରମ୍। ମାଲୟାଲମ ଭାଷାରେ ନାନ୍ମା ମାରମ କହିଲେ ଦେବୀଙ୍କ ବୃକ୍ଷ। ବୃକ୍ଷ ଯେଭଳି ପକ୍ଷୀଙ୍କୁ ଆଶ୍ରୟ ଦିଏ, ଅନ୍ୟମାନଙ୍କୁ ଛାୟା ପ୍ରଦାନ କରେ ସେହିଭଳି ଏହି ସଂଗଠନ ସମାଜରେ ଏକ ଭିନ୍ନ ପ୍ରକାର ସେବା ଜାରି ରଖିଛି। ଏହାର ପ୍ରତିଷ୍ଠାତା ହେଉଛନ୍ତି କସାରଗଡ଼ ଜିଲା କାହ୍ନାଗଡ଼ର ସଲାମ କେରଳ। ସଲାମ ଓ ତାଙ୍କ ଟିମ୍ କମ୍ୟୁନିଟି କିଚେନ ମାଧ୍ୟମରେ ଗରିବମାନଙ୍କୁ ମାଗଣାରେ ଖାଇବାକୁ ଦେଉଛନ୍ତି। ଗରିବ ପିଲାମାନଙ୍କୁ ପଢ଼ାଇ ସଶକ୍ତ କରୁଛନ୍ତି। ଏହା ବ୍ୟତୀତ ଗରିବ ପରିବାରକୁ ସ୍ବାସ୍ଥ୍ୟ ସେବା ଯୋଗାଇ ଦେଉଛନ୍ତି। କାହ୍ନାଗଡରେ ଲକ୍ଡାଉନ ସମୟରେ ସଲାମ ନିଜସ୍ବ ଉଦ୍ୟମରେ ପ୍ରତିଦିନ ପାଖାପାଖି ୧୦ ଜଣଙ୍କୁ ରୋଷେଇ କରି ଖାଇବାକୁ ଦେବା ଆରମ୍ଭ କରିଥିଲା। ପରେ ଏହି ସଂଖ୍ୟା ୫୦କୁ ବଢ଼ିଥିଲା। ସଲାମ ତାଙ୍କ ବନ୍ଧୁମାନଙ୍କ ସହାୟତାରେ ଏହାକୁ ଆଗକୁ ବଢ଼ାଇଥିଲେ। ସେ ‘ନାନମା ମାରମ’ ସଂଗଠନକୁ ପଞ୍ଜୀକୃତ କରିବା ପରେ ତାଙ୍କ ଟିମ୍ରେ ଅଧିକ ଲୋକ ସାମିଲ ହୋଇଥିଲେ। ଏବେ ସେ ଏହା ମାଧ୍ୟମରେ ୬୦ଜଣଙ୍କୁ ମାଗଣାରେ ଖାଇବାକୁ ଦେଉଛନ୍ତି। ପ୍ରତିଦିନ ଏହା ବାବଦରେ ୧,୨୦୦ ଟଙ୍କା ଖର୍ଚ୍ଚ ହେଉଛି। ଏଥିପାଇଁ ଲୋକେ ତାଙ୍କୁ ପାଣ୍ଠି ବି ଯୋଗାଇ ଦେଉଛନ୍ତି। କେବଳ ଏତିକି ନୁହେଁ ଏହି ସଂସ୍ଥା ଲୋକଙ୍କୁ କ୍ଷୁଦ୍ର ବ୍ୟବସାୟ କରିବା ଲାଗି ସାହାଯ୍ୟ କରୁଛି।