ପରିବେଶ ଉପଯୋଗୀ କାଫେର ଏକ ଦୃଷ୍ଟାନ୍ତ ଦେଖିବାକୁ ମିଳିଛି ମୁମ୍ବାଇରେ। ଏହାର ନାମ ଯୋଗୀସତ୍ତ୍ୱ କାଫେ। ରବିନା ତୌରାନି ଏହାର ମାଲିକ। ଏଠାରେ ଶତ ପ୍ରତିଶତ ଉଦ୍ଭିଜ ତଥା ଶୁଦ୍ଧ ଶାକାହାରୀ ଖାଦ୍ୟ ପ୍ରସ୍ତୁତ କରାଯାଉଛି। ରବିନା ଜଣେ ପୂର୍ବତନ ଚଳଚ୍ଚିତ୍ର ନାୟିକା। ୨୦୦୨ରେ ସେ ଦିଲ୍ ହାଏ ତୁମାରା କିମ୍ବା ବାଙ୍ଗ୍ ବାଙ୍ଗ୍ ସିନେମାରେ ଅଭିନୟ କରିଥିଲେ। ୨୦୧୪ରେ ମେରୁଦଣ୍ଡ ଆଘାତଜନିତ ସମସ୍ୟା ଯୋଗୁ ତାଙ୍କ କ୍ୟାରିୟରରେ ପୂର୍ଣ୍ଣଚ୍ଛେଦ ପଡ଼ିଥିଲା। ଶାକାହାରୀ ଉଦ୍ଭିଜ ଖାଦ୍ୟ ଉପରେ ସେ ଆଡ୍ଭାନ୍ସଡ ଡିପ୍ଲୋମା କରିବା ପରେ ୨୦୨୧ରେ ବାନ୍ଦ୍ରାରେ ଏହି କାଫେ ଖୋଲିଥିଲେ। ବଡ଼ କଥା ହେଉଛି, କାଫେରୁ ଯାହା ତରଳ/ ଓଦା ବର୍ଜ୍ୟ ବାହାରୁଛି ତାହାକୁ ସେ ଖତ କରୁଛନ୍ତି ଓ ଶୁଖିଲା ବର୍ଜ୍ୟ ଯଥା ପରିବାଚୋପା ଆଦିକୁ ବୁଲା ଗୋରୁଙ୍କୁ ଖାଇବାକୁ ଦେଉଛନ୍ତି। ସମସ୍ତ କାର୍ଟୁନ ଓ ବକ୍ସଗୁଡ଼ିକୁ ସେ ରିସାଇକେଲ ସଂସ୍ଥା ଫାଇଭ୍-ସାଇକେଲକୁ ଦେଉଛନ୍ତି। କାଫେରେ ଆଦୌ ପ୍ଲାଷ୍ଟିକ ବ୍ୟବହାର କରାଯାଉନାହିଁ। କେବଳ ଜୈବିକ ଫଳ, ପରିବା ଓ ଡ୍ରାଏ ଫ୍ରୁଟ୍ସରୁ ଖାଦ୍ୟ ପ୍ରସ୍ତୁତ କରାଯାଉଛି। ରବିନା ଏସବୁ ମହାରାଷ୍ଟ୍ରର କୃଷକମାନଙ୍କଠାରୁ ସଂଗ୍ରହ କରୁଛନ୍ତି। ଉକ୍ତ କାଫେରେ ଭାରତ ବ୍ୟତୀତ ଶୁଦ୍ଧ ଶାକାହାରୀ ମେକ୍ସିକୋ, ଲେବାନନ୍ ଏବଂ ଭିଏଟ୍ନାମ ବ୍ୟଞ୍ଜନ ମଧ୍ୟ ପରଷାଯାଉଛି।