ଜଣେ ଦିନ ମଜୁରିଆଙ୍କ ପରିବେଶ ସଂରକ୍ଷଣଭିତ୍ତିକ କାର୍ଯ୍ୟ ଏକ ଦୃଷ୍ଟାନ୍ତ ସୃଷ୍ଟି କରିଛି। କେରଳର ଏହି ବ୍ୟକ୍ତି ଜଣକ ହେଉଛନ୍ତି ସି. ସି. କାନ୍ନନ। ସେ ରହୁଛନ୍ତି ଏର୍ନାକୁଲମର ଇଷ୍ଟ ମାରାଡି ଅଞ୍ଚଳରେ। କାନ୍ନନ ଦୀର୍ଘ ୨୫ ବର୍ଷ ହେଲା ସ୍କୁଲ, ରାସ୍ତାକଡ଼ ଏବଂ ପଡ଼ିଆ ରହିଥିବା ଜମିରେ ବୃକ୍ଷରୋପଣ କରିଆସିଛନ୍ତି। ଅଙ୍ଗନଓ୍ବାଡି କେନ୍ଦ୍ରଗୁଡ଼ିକରେ ସେ ବିଭିନ୍ନ ଫୁଲ ଓ ଫଳଗଛ ମଧ୍ୟ ଲଗାଉଛନ୍ତି। ଏଥିପାଇଁ ତାଙ୍କୁ ସବୁଜ ଯୋଦ୍ଧା ଭାବେ ପୁରସ୍କୃତ କରାଯାଇଛି। ସେ ପ୍ରଥମେ ୫୦ଟି ଗଛ ରାସ୍ତାକଡ଼ରେ ଲଗାଇ ତାଙ୍କ ବୃକ୍ଷରୋପଣ ଅଭିଯାନ ଆରମ୍ଭ କରିଥିଲେ ଓ ସେବେଠାରୁ ସେ ଗଛ ଲଗାଇବା ଜାରି ରଖିଛନ୍ତି। ପ୍ରତିଦିନ ବଡ଼ି ଭୋରୁ ସେ ଏହି କାର୍ଯ୍ୟରେ ବାହାରିପଡ଼ନ୍ତି। ମାଠିଆରେ ପାଣି ଭରନ୍ତି । ପ୍ରଥମେ ପୂର୍ବରୁ ଲଗାଇଥିବା ଗଛରେ ପାଣି ଦିଅନ୍ତି ଓ ପରେ ଅନ୍ୟ ଗଛ ରୋପଣ କରିବା ପରେ ତାଙ୍କ କାମକୁ ବାହାରି ଯାଆନ୍ତି। ଦିନ ମଜୁରିଆ ଭାବେ ଯାହା ରୋଜଗାର କରୁଛନ୍ତି ତାହାର ଏକ ସିଂହଭାଗ ସେ ଏଥିରେ ବ୍ୟୟ କରୁଛନ୍ତି। ଏବେ ତାଙ୍କୁ ଅନ୍ୟ ଜିଲାର ସ୍କୁଲଗୁଡ଼ିକରେ ଗଛ ଲଗାଇବା ଲାଗି ଡାକରା ଆସୁଛି ଓ ସେ ସେଠାରେ ଗଛ ଲଗାଇ ଖୁସି ଅନୁଭବ କରୁଛନ୍ତି ବୋଲି କହନ୍ତି କାନ୍ନନ।