ଇ କମର୍ସ କମ୍ପାନୀଗୁଡ଼ିକ ଦ୍ୱାରା ପସନ୍ଦର ଜିନିଷ ଘରେ ପହଞ୍ଚୁଥିବା ଭଳି ଏବେ ବେଙ୍ଗାଲୁରୁର ୨ ଭଉଣୀ ଯଶୋଦା ଏବଂ ରେହା କାରୁତୁରି ଲୋକଙ୍କୁ ପୂଜାଫୁଲ ଦେଉଛନ୍ତି। ସେମାନେ ହୁଭୁ (କନ୍ନଡ ଭାଷାରେ ଫୁଲ) ଫ୍ରେଶ୍ ଷ୍ଟାର୍ଟଅପ୍ ଗଠନ କରି ତା’ ମାଧ୍ୟମରେ ଘରେ ଘରେ ଫୁଲ ପହଞ୍ଚାଉଛନ୍ତି ଓ ଏଥିରେ ଶତାଧିକ ଲୋକଙ୍କୁ ନିଯୁକ୍ତି ଦେଇଛନ୍ତି। ୨୦୧୯ରେ ସେମାନେ ଏହି କାର୍ଯ୍ୟ ଆରମ୍ଭ କରି ୧୦ ଲକ୍ଷ ଟଙ୍କା ନିବେଶ କରିଥିଲେ। ଏବେ ସେଥିରୁ ଏହି ଦୁଇ ଭଉଣୀ ବାର୍ଷିକ ୮ କୋଟି ଟଙ୍କା ରୋଜଗାର କରୁଛନ୍ତି। ତାଙ୍କ ପରିବାର ଫୁଲ ବ୍ୟବସାୟରେ ଜଡ଼ିତ ରହିଥିବାରୁ ଏମାନେ ଏଥିପ୍ରତି ଆକର୍ଷିତ ହୋଇ ଏଭଳି କାର୍ଯ୍ୟ କରୁଛନ୍ତି। ସେମାନେ କର୍ନାଟକ, କେରଳ ଓ ତାମିଲନାଡୁର ପାଖାପାଖି ୫୦ ଜଣ କୃଷକଙ୍କଠାରୁ ଫୁଲ ସଂଗ୍ରହ କରୁଛନ୍ତି। କୌଣସି ମଧ୍ୟସ୍ଥଙ୍କୁ ନିଯୁକ୍ତ ନ କରି କୃଷକମାନଙ୍କ ସହ ସିଧାସଳଖ ସମ୍ପର୍କ ରଖୁଥିବାରୁ ସେମାନେ ଭଲ ଲାଭ ପାଉଛନ୍ତି। ପ୍ୟାକିଂ ପଦ୍ଧତି ଉଚ୍ଚମାନର ରହିଥିବାରୁ ଫୁଲ ପ୍ରାୟ ୨ ସପ୍ତାହ ଯାଏ ଫ୍ରେଶ୍ ରହିପାରୁଛି। ମାସକୁ ସେମାନେ ଦେଢ଼ ଲକ୍ଷରୁ ଊର୍ଦ୍ଧ୍ୱ ଅର୍ଡର ପାଉଛନ୍ତି।
