ଫିଲ୍ମରେ ହସ୍ପିଟାଲରେ ବାହାଘର ହେବା ପ୍ରାୟତଃ ଅନେକେ ଦେଖିଥିବେ। କିନ୍ତୁ ବାସ୍ତବରେ ହସ୍ପିଟାଲର ଆଇସିୟୁ ରୁମ୍ ବାହାରେ ବିବାହ ଅନୁଷ୍ଠିତ ହେବା କଥା କେହି ଦେଖିଛନ୍ତି କିମ୍ବା ଶୁଣିଛନ୍ତି କି। କଥାଟା ଅଡ଼ୁଆ ଲାଗୁଥିଲେ ମଧ୍ୟ ସତ। କାରଣ କିଛି ଏଭଳି ଦୃଶ୍ୟ ଦେଖିବାକୁ ମିଳିଛି ବିହାରର ଗୟାରେ। ଏଠାକାର ମାଜିଷ୍ଟ୍ରେଟ କଲୋନି ସ୍ଥିତ ଏକ ଘରୋଇ ଅର୍ଶ ହସ୍ପିଟାଲର ଆଇସିୟୁ ଓ୍ବାର୍ଡରେ ଭର୍ତ୍ତି କରାଯାଇଥିବା ଜଣେ ମହିଳା ନିଜ ଝିଅଙ୍କ ବିବାହ କରାଇବାର କିଛି ଘଣ୍ଟା ପରେ ଶେଷ ନିଃଶ୍ୱାସ ତ୍ୟାଗକରିଛନ୍ତି। ଗୟା ଜିଲାର ଗୁରାରୁ ବ୍ଲକ୍ ବାଲି ଗ୍ରାମର ଲଲନ କୁମାରଙ୍କ ସ୍ତ୍ରୀ ପୁନମ୍ ବର୍ମା ହୃଦ୍ଘାତରେ ପୀଡ଼ିତ ହୋଇ ଉକ୍ତ ହସ୍ପିଟାଲର ଆଇସିୟୁ ଓ୍ବାର୍ଡରେ ଭର୍ତ୍ତି ହୋଇଥିଲେ। ଯେକୌଣସି ସମୟରେ ପୁନମ୍ଙ୍କର ମୃତ୍ୟୁ ହୋଇପାରେ ବୋଲି ଡାକ୍ତର କହିଥିଲେ। ତେବେ ସବୁ ମା’ଙ୍କ ଭଳି ପୁନମ୍ଙ୍କ ମଧ୍ୟ ଆଶା ଥିଲା ଯେ, ସେ ଜୀବିତ ଅବସ୍ଥାରେ ତାଙ୍କ ଝିଅ ଚାନ୍ଦିନୀଙ୍କ ବିବାହ ଦେଖିବେ। ପୂର୍ବରୁ ସୋମବାର (ଡିସେମ୍ବର ୨୬) ଚାନ୍ଦିନୀଙ୍କର ଗୁରାରୁ ବ୍ଲକର ସଲେମପୁର ଗ୍ରାମର ସୁମିତ ଗୌରବଙ୍କ ସହ ନିର୍ବନ୍ଧ ନିର୍ଦ୍ଧାରିତ ହୋଇଥିଲା। ହେଲେ ଏହାର ଗୋଟିଏ ଦିନ ପୂର୍ବରୁ ହସ୍ପିଟାଲର ଆଇସିୟୁ ରୁମ୍ ବାହାରେ ବିବାହ ଅନୁଷ୍ଠିତ ହେଲା ଓ ବିବାହର ମାତ୍ର ୨ଘଣ୍ଟା ପରେ ପୁନମ୍ଙ୍କର ମୃତ୍ୟୁ ଘଟିଥିଲା।