ଭାରତରେ ଏମିତି ଏକ ପରିବାର ଅଛି, ଯାହା ୭ ପିଢ଼ି ଧରି ଅର୍ଥାତ୍ ଅଷ୍ଟାଦଶ ଶତାବ୍ଦୀରୁ ଏଯାବତ୍ ଶ୍ରେଷ୍ଠ କଳାକାରଙ୍କୁ ସିତାର, ତାନପୁରା ଏବଂ ବୀଣା ଯୋଗାଇ ଆସୁଛି। ମହାରାଷ୍ଟ୍ରର ପୁରାତନ ଐତିହାସିକ ସହର ମିରାଜ୍ରେ ବାସ କରନ୍ତି ଏହି ପରିବାର। ଭାରତର ଅଧିକାଂଶ ପ୍ରତିଷ୍ଠିତ ମ୍ୟୁଜିସିଆନ ଏହି ପରିବାରଠାରୁ ବାଦ୍ୟଯନ୍ତ୍ର କ୍ରୟ କରିଥାନ୍ତି। ମରାଠା ସାମ୍ରାଜ୍ୟରେ ଅସ୍ତ୍ରଶସ୍ତ୍ର ନିର୍ମାଣ କରୁଥିଲେ ଶିକାଲଗାର ସମ୍ପ୍ରଦାୟ। ଅସ୍ତ୍ରଶସ୍ତ୍ର ଚାହିଦା କମିବା ପରେ ଏମାନେ ବାଦ୍ୟଯନ୍ତ୍ର ନିର୍ମାଣ ଆରମ୍ଭ କରିଥିଲେ।
ଏବେ ବି ସେମାନେ ହାତରେ ବାଦ୍ୟଯନ୍ତ୍ର ନିର୍ମାଣ କରୁଛନ୍ତି। ଗୋଟିଏ ତାନପୁରା ନିର୍ମାଣ କରିବା ପାଇଁ ୭/୮ ଜଣଙ୍କୁ ମାସେ ଲାଗିଯାଏ। ଉକ୍ତ ସମ୍ପ୍ରଦାୟର ପରିବାରଗୁଡ଼ିକ ପରସ୍ପର ମଧ୍ୟରେ ବୁଝାମଣା ରଖି କାମ କରୁଛନ୍ତି। ଅଧିକାଂଶ ଓ୍ବାର୍କଶପ୍ ବର୍ଷକୁ ୧୦୦-୧୨୫ ସିତାର କିମ୍ବା ତାନପୁରା ତିଆରି କରିପାରୁଛନ୍ତି। ତେବେ ବୈଦ୍ୟୁତିକ ବାଦ୍ୟଯନ୍ତ୍ର ବିକାଶ ହେବା ପରେ ଏହି ପରିବାରର ବ୍ୟବସାୟ ପ୍ରଭାବିତ ହୋଇଛି। ଏହି ଶିଳ୍ପରେ ଅନେକ ହଜାର ଲୋକ କାମ କରୁଥିଲେ, କିନ୍ତୁ ଏବେ ଏହା ଅନେକ ଶହରେ ସୀମିତ ରହିଛି।