ପଞ୍ଜାବ, ହରିୟାଣା ଓ ଉତ୍ତରପ୍ରଦେଶ ରାଜ୍ୟଗୁଡ଼ିକରେ ଧାନ କିମ୍ବା ଗହମ ଅମଳ ପରେ କୃଷକମାନେ ଖୁଣ୍ଟା ପୋଡ଼ିଦିଅନ୍ତି। ଏହାଦ୍ୱାରା ଦିଲ୍ଲୀ ସମେତ ଉତ୍ତର ଭାରତର ବହୁ ସହରରେ ବାୟୁର ମାନ ହ୍ରାସ ପାଇବା ଦ୍ୱାରା ସ୍ବାସ୍ଥ୍ୟଗତ ସମସ୍ୟା ଉପୁଜୁଛି। ଖୁଣ୍ଟା ପୋଡ଼ି ରୋକି ଏଭଳି ସମସ୍ୟା ଦୂର କରିବାରେ ନୂଆ ବାଟ ଦେଖାଇଛନ୍ତି ଚଣ୍ଡିଗଡ଼ର ତିନି ବନ୍ଧୁ ବୀରେନ୍ଦ୍ର ସିଂ, ନୀତୀନ କୁମାର ସାଲୁଜା ଏବଂ ବିଳାସ ଚିକ୍କରା। କୃଷକ ପରିବାରରେ ଜନ୍ମିତ ଏହି ତିନିବନ୍ଧୁ ଏକ ମେଶିନ ନିର୍ମାଣ କରିଛନ୍ତି; ଯାହା ଶସ୍ୟ ଖୁଣ୍ଟାକୁ ପାଉଡର କରିପାରୁଛି ଓ ଏହାକୁ ଇଟାତିଆରିରେ ବ୍ୟବହାର କରାଯାଉଛି। କେବଳ ଏତିକି ନୁହେଁ ଏହି ପାଉଡରରୁ ବାୟୋଫୁଏଲ ମଧ୍ୟ ପ୍ରସ୍ତୁତ କରାଯାଉଛି। ୨୦୧୮ରେ ସେମାନେ ଜିଏଫ୍ଟି ଟେକ୍ନୋଲୋଜି ଷ୍ଟାର୍ଟଅପ୍ ଗଠନ କରି ତା’ ଦ୍ୱାରା ନିର୍ମାଣ କରିଥିବା ମେଶିନର ନାମ ରଖିଛନ୍ତି ‘ମୋକ୍ଷ’ । ଏହାକୁ ଏକ ଟ୍ରାକ୍ଟରରେ ଖଞ୍ଜାଯିବା ପରେ ଏହା ବିଲରୁ ଖୁଣ୍ଟା ସଂଗ୍ରହ କରି ପାଉଡର କରିଦେଉଛି । ୪୦ ମିନିଟରେ ଏହା ୧ ଏକର ଜମରୁ ଖୁଣ୍ଟା ସଫା କରିଦେଉଛି। ଫଳରେ ଚାଷୀମାନଙ୍କର ଜମି ସଫା କରିବା ବ୍ୟୟ କମ୍ ହେବା ସହ ପରିବେଶ ମଧ୍ୟ ସୁସ୍ଥ ରହୁଛି।