ପ୍ରଶାସନିକ ସେବା ସହ ଦୃଷ୍ଟିବାଧିତ ପିଲାଙ୍କୁ ଶିକ୍ଷାର ମୁଖ୍ୟସ୍ରୋତରେ ସାମିଲ କରିବା ପାଇଁ ଆଇଏଏସ୍ ଅଧିକାରୀ ରିଚା ଚୌଧୁରୀଙ୍କ ପ୍ରୟାସ ପ୍ରେରଣାଦାୟୀ। ଛତିଶଗଡ଼ ଆଦିବାସୀ ଅଧ୍ୟୁଷିତ ଜିଲା ଗୌରେଲା ପାଣ୍ଡ୍ରି ମାରଓ୍ବିର ଜିଲାପାଳ ରିଚା ୨୦୨୨ରେ ଆଂଶିକ କିମ୍ବା ପୂର୍ଣ୍ଣ ଦୃଷ୍ଟିବାଧିତ ପିଲାମାନଙ୍କୁ ପ୍ରାଥମିକ ସ୍କୁଲରେ ନାମ ଲେଖାଇବା ଲାଗି ଅଭିଯାନ ଆରମ୍ଭ କରିଥିଲେ। ଆଦିବାସୀ ପରିବାରଗୁଡ଼ିକର ଅଭିଭାବକମାନେ ଏଭଳି ପିଲାମାନଙ୍କୁ ସ୍କୁଲ ନ ପଠାଇ ଘରେ ରଖୁଥିଲେ। ସ୍କୁଲରେ ଏଭଳି ପିଲାମାନଙ୍କ ନାମ ଲେଖାଇବା ଦ୍ୱାରା ସେମାନଙ୍କୁ ଅଭିଭାବକମାନେ ବୋଝ ମଣୁନାହାନ୍ତି ବୋଲି କହନ୍ତି ରିଚା। ଏହି କାର୍ଯ୍ୟରେ ‘ଏକ୍ କଦମ୍ ଫାଉଣ୍ଡେଶନ’କୁ ସେ ସାମିଲ କରିଛନ୍ତି। ଏବେ ସୁଦ୍ଧା ରିଚା ଜିଲାରେ ପ୍ରାଥମିକ ସ୍କୁଲ ବୟସ ବର୍ଗର ଆଂଶିକ କିମ୍ବା ପୂର୍ଣ୍ଣ ଦୃଷ୍ଟିବାଧିତ ୧୨୦ ପିଲାଙ୍କୁ ଚିହ୍ନଟ କରି ସ୍କୁଲରେ ନାମ ଲେଖାଇ ପାରିଛନ୍ତି। ଏହି ପିଲାମାନେ ଅନ୍ୟମାନଙ୍କ ଭଳି ସବୁଦିନ ସ୍କୁଲ ଯାଉଛନ୍ତି। ସରକାରୀ ସ୍କୁଲଗୁଡ଼ିକରେ ପାଠ୍ୟ ଉପକରଣ ସୁବିଧା ମଧ୍ୟ କରାଯାଇଛି। ସବୁ ପୁସ୍ତକର ବିଷୟଗୁଡ଼ିକୁ ବ୍ରେଲିକୁ ବଦଳାଇ ପଢ଼ିବାର ବ୍ୟବସ୍ଥା କରିଛନ୍ତି ରିଚା। ପିଲାମାନଙ୍କୁ ଅକ୍ଷର ଚିହ୍ନାଇବା ପାଇଁ ବ୍ରେଲି ପ୍ରଶିକ୍ଷଣ ଦିଆଯାଉଛି। ଏଥିନିମନ୍ତେ ଶିକ୍ଷକ, କର୍ମଚାରୀମାନଙ୍କୁ ନେଇ କର୍ମଶାଳା ଆୟୋଜନ କରାଯାଉଛି।