ଅଦରକାରୀ ପାର୍ଟଗୁଡ଼ିକରେ ନିର୍ମିତ ଏକ ବିଦ୍ୟୁତ୍ ଚାଳିତ ବାଇକ୍ରେ ୬ ଜଣ ବସି ଆରାମରେ ଯାଇପାରୁଛନ୍ତି। ଶୁଣି ଆଶ୍ଚର୍ଯ୍ୟ ଲାଗୁଥିଲେ ବି ଏହା ସତ। ଉତ୍ତରପ୍ରଦେଶ ଆଜମଗଡ଼ ନିବାସୀ ଅସଦ ଅବଦୁଲ୍ଲା ଏହାର ନିର୍ମାତା। ଅସଦ ଏବେ ଆଇଆଇଟି ଛାତ୍ର। କୃଷକ ପରିବାରର ପିଲା ହୋଇଥିବାରୁ ତାଙ୍କୁ ବହୁ କାର୍ଯ୍ୟ ବାଇକ୍ରେ କରିବାକୁ ପଡ଼େ। ହେଲେ ବର୍ଦ୍ଧିତ ପେଟ୍ରୋଲ ଦର ଓ ପରିବେଶ ଉପରେ ଉକ୍ତ ଇନ୍ଧନର ପ୍ରଭାବ ଅସଦଙ୍କୁ ଇଲେକ୍ଟ୍ରିକ୍ ମୋଟର ସାଇକେଲ ନିର୍ମାଣ କରିବାକୁ ପ୍ରେରିତ କରିଥିଲା। ସବୁଠୁ ବଡ଼ କଥା ହେଉଛି ସେ ବାଇକ୍ର ସବୁ ପାର୍ଟ କବାଡିଆ ଦୋକାନରୁ ଯୋଗାଡ଼ କରି ଗୋଟିଏ ମାସରେ ଏହାକୁ ନିର୍ମାଣ କରିଛନ୍ତି। ମୋଟରେ ଏହି ବାଇକ୍ ନିର୍ମାଣରେ ୧୨ ହଜାର ଟଙ୍କା ଖର୍ଚ୍ଚ ହୋଇଛି। ଥରେ ଚାର୍ଜ ହେଲେ ଏହା ୧୫୦ କି.ମି. ଯାଉଛି ଓ ଗ୍ରାମାଞ୍ଚଳ ରାସ୍ତା ଲାଗି ପୂରା ଉପଯୋଗୀ ବୋଲି କହନ୍ତି ଅସଦ। ଅସଦଙ୍କୁ ୮ ବର୍ଷ ହୋଇଥିବାବେଳେ ଏକ ରିମୋଟ୍ ଚାଳିତ ଖେଳନା କରିଥିଲେ। ସେବେଠାରୁ କିଛି ନୂଆ ଚିନ୍ତା କରିଆସୁଥିଲେ। ଏବେ ଏହି ବିଦ୍ୟୁତ୍ଚାଳିତ ବାଇକ୍ ନିର୍ମାଣ କରିବା ପରେ ସେ ସୋଲାରଚାଳିତ ଯାନ ନିର୍ମାଣ କରିବାକୁ ଯୋଜନା ରଖିଛନ୍ତି।