ଜଣେ ଆଇଏଏସ୍ ଅଧିକାରୀଙ୍କ ନିଜ ଦାୟିତ୍ୱ ବାଦ୍ ନିଆରା ଉପାୟରେ ଜଳାଶୟ ପୁନରୁଦ୍ଧାର ନିଶ୍ଚିତ ଭାବେ ପ୍ରେରଣାଦାୟକ। ଏଭଳି କାର୍ଯ୍ୟ କରୁଛନ୍ତି ମଧ୍ୟପ୍ରଦେଶ ଉଜ୍ଜୟିନୀ ମ୍ୟୁନିସିପାଲ କମିଶନର ଅଂଶୁଲ ଗୁପ୍ତା। ବଡ଼ କଥା ହେଉଛି ସେ ସରକାରୀ ଅନୁଦାନ ବିନା କେବଳ ସ୍ବେଚ୍ଛାସେବୀମାନଙ୍କ ଦ୍ୱାରା ଓ ସଂଗୃହୀତ ପାଣ୍ଠି ମାଧ୍ୟମରେ ୫ ଏକରବିଶିଷ୍ଟ ଜଳାଶୟ ପୁନରୁଦ୍ଧାର କରିଛନ୍ତି। ୨୦୧୬ ବ୍ୟାଚ୍ ଆଇଏଏସ୍ ଅଧିକାରୀ ଅଂଶୁଲ ୨୦୨୧ରେ ଉଜ୍ଜୟିନୀ ମ୍ୟୁନିସିପାଲ କମିଶନର ଦାୟିତ୍ୱ ନେବା ପରେ ଏଭଳି ପଦକ୍ଷେପ ନେଇଥିଲେ। ଉଜ୍ଜୟିନୀ ନିକଟରେ ଥିବା ଏହି ଜଳାଶୟ ସେଠାକାର କୃଷିରେ ପ୍ରମୁଖ ଭୂମିକା ନିଏ। ଏହା ପରିତ୍ୟକ୍ତ ଅବସ୍ଥାରେ ରହିଥିଲା। ୧୨୫ ଜଣ ସ୍ବେଚ୍ଛାସେବୀଙ୍କୁ ନେଇ ଏନ୍ଭାଇରନ୍ମେଣ୍ଟାଲିଷ୍ଟ ଫାଉଣ୍ଡେଶନ ଅଫ୍ ଇଣ୍ଡିଆ( ଇଏଫ୍ଆଇ) ଓ ସ୍ଥାନୀୟ ପ୍ରଶାସନ ସହଯୋଗରେ ଏହାର ପୁନରୁଦ୍ଧାର ସମ୍ଭବ ହୋଇଛି। ଏଥିରେ ୬୦ ଲକ୍ଷ ଟଙ୍କା ଖର୍ଚ୍ଚ ହୋଇଛି ଓ ଏହା ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଯୋଗାଡ଼ କରିଛନ୍ତି ଅଂଶୁଲ। ପୂର୍ବରୁ ସେ ଉମାରିଆ ଜିଲାର ଜିଲା ପଞ୍ଚାୟତ ସିଇଓ ଥିବା ସମୟରେ ୩୦ଟି ପରିତ୍ୟକ୍ତ ଜଳାଶୟ ସରକାରୀ ଯୋଜନାରେ ପୁନରୁଦ୍ଧାର କରିଥିଲେ।