ଇଞ୍ଜିନିୟରିଂ ପଢ଼ା ଛାଡ଼ି ପ୍ରବୀଣ ନାୟକ ବର୍ଜ୍ୟ ଦାଉରୁ ଦିଲ୍ଲୀକୁ ସୁରକ୍ଷିତ ରଖିବା ପାଇଁ ଅଭିଯାନ ଚଳାଇଛନ୍ତି। ସେ ୨୦୧୮ରେ ଏଥିପାଇଁ ‘ଗାର୍ବେଜ କ୍ଲିନିକ୍’ ପ୍ରତିଷ୍ଠା କରି ଦିଲ୍ଲୀର ବିଭିନ୍ନ ଅଞ୍ଚଳରୁ ବର୍ଜ୍ୟ ସଂଗ୍ରହ ପାଇଁ ଏକ ଆମ୍ବୁଲାନ୍ସ ସିଷ୍ଟମ ଆରମ୍ଭ କରିଥିଲେ। ବିଭିନ୍ନ ଅଞ୍ଚଳରୁ ସଂଗୃହୀତ ବର୍ଜ୍ୟକୁ ଟ୍ରିଟ୍ କରୁଛନ୍ତି। କଠିନ ବର୍ଜ୍ୟକୁ ସ୍କ୍ରାପ୍ ଡିଲରଙ୍କୁ ଦେଉଥିବାବେଳେ ଓଦା ବର୍ଜ୍ୟରୁ ଖତ ପ୍ରସ୍ତୁତକରି କୃଷକମାନଙ୍କୁ ଯୋଗାଉଛନ୍ତି। ପ୍ରବୀଣ ବର୍ତ୍ତମାନ ସୁଦ୍ଧା ଦିଲ୍ଲୀରେ ୧୮ଟି ଗାର୍ବେଜ କ୍ଲିନିକ୍ ପ୍ରତିଷ୍ଠା କରିଛନ୍ତି। ବର୍ଜ୍ୟ ସଂଗ୍ରହ ପାଇଁ ଇ-ରିକ୍ସାଗୁଡ଼ିକୁ ବର୍ଜ୍ୟ ଆମ୍ବୁଲାନ୍ସ ଭାବେ ବ୍ୟବହାର କରାଯାଉଛି। ସେ ପଢୁଥିବା ସମୟରେ ଦିଲ୍ଲୀରେ ପାହାଡ଼ ଭଳି ବର୍ଜ୍ୟ ଗଦା ହେଉଥିବା ଦୃଶ୍ୟ ଦେଖିବାକୁ ପାଇଥିଲେ। ପରେ ଏକ ବର୍ଜ୍ୟଗଦା ଭୁଶୁଡ଼ି ୪ ଜଣଙ୍କ ମୃତ୍ୟୁ ହେବା ପରେ ଏହା ପ୍ରବୀଣଙ୍କୁ ପ୍ରଭାବିତ କରିଥିଲା। ଫଳରେ ସେ ଦିଲ୍ଲୀର ବର୍ଜ୍ୟ ପରିଚାଳନାରେ ପରିବର୍ତ୍ତନ ଆଣିବା ଲାଗି ପଢ଼ା ଛାଡ଼ି ବର୍ଜ୍ୟ ସଂଗ୍ରହ ଆରମ୍ଭ କରିଥିଲେ। ପ୍ରାରମ୍ଭିକ ପର୍ଯ୍ୟାୟରେ ପରିବାର ଲୋକେ ତାଙ୍କୁ ବିରୋଧ କରିଥିଲେ ବି ପରେ ତାଙ୍କର ଏହି କାର୍ଯ୍ୟକୁ ସମର୍ଥନ କରିବାକୁ ବାଧ୍ୟ ହୋଇଥିଲେ। ପ୍ରବୀଣଙ୍କ ବିବାହ ପରେ ତାଙ୍କ ସ୍ତ୍ରୀ ସହଯୋଗର ହାତ ବଢ଼ାଇଛନ୍ତି। ଫଳରେ ଏହି ସଂସ୍ଥା ବର୍ଷକୁ ଏବେ ୧.୫ କେଟି ଟଙ୍କାର କାରବାର କରିପାରୁଛି ଓ ପରିବେଶ ସୁଧାରିବାରେ ପ୍ରମୁଖ ଭୂମିକା ନେଉଛି।