ନିଜ ଭବିଷ୍ୟତ କଥା ଚିନ୍ତା ନ କରି ପିଲାଙ୍କ ଶିକ୍ଷା ଲାଗି ସବୁ କିଛି ଦାନ କରିଦେଇ ଅନ୍ୟମାନଙ୍କ ପାଇଁ ଆଦର୍ଶ ପାଲଟିଛନ୍ତି ହୁଚ୍ଚାମ୍ମା ଚୌଦ୍ରି। କର୍ନାଟକ ହାଭେରି ଜିଲା କୁନିକେରି ଗାଁରେ ରହନ୍ତି ହୁଚ୍ଚାମ୍ମା। ସେ ଓ ତାଙ୍କ ସ୍ବାମୀ ବାଶାପ୍ପାଙ୍କ ସହ ଚାଷକରି ଜୀବିକା ନିର୍ବାହ କରୁଥିଲେ। ସେମାନଙ୍କର ସନ୍ତାନ ନ ଥିଲା। ବାଶାପ୍ପାଙ୍କ ଦେହାନ୍ତ ପରେ ସେ ତାଙ୍କ ଗାଁରେ ସ୍କୁଲ ପାଇଁ ୨ ଏକର ଜମି ଦାନ କରିଦେଇଛନ୍ତି। ପ୍ରଥମେ ସ୍କୁଲ ବିଲ୍ଡିଂ ପାଇଁ ୧ଏକର ଦାନ ଦେଇଥିଲେ। ପରେ ସ୍କୁଲ ନିମନ୍ତେ ଖେଳପଡ଼ିଆ ଦରକାର ପଡ଼ିବାରୁ ହୁଚ୍ଚାମ୍ମା ଅବଶିଷ୍ଟ ୧ ଏକର ଦାନ କରିଦେଇଥିଲେ। ଏହି ଜମିର ଏବକାର ବଜାର ମୂଲ୍ୟ ୧ କୋଟି ଟଙ୍କାରୁ ଅଧିକ । ସବୁଠୁ ବଡ଼ କଥା ହେଉଛି ହୁଚ୍ଚାମ୍ମା ଏବେ ସେହି ସ୍କୁଲରେ ମଧ୍ୟାହ୍ନଭୋଜନ ମୁଖ୍ୟ ରୋଷେୟା ଭାବେ କାମ କରୁଛନ୍ତି। ଏବେ ତାଙ୍କୁ ୭୫ ବର୍ଷ ବୟସ। ପରିଣତ ବୟସରେ ଏକାକୀ ରହୁଥିଲେ ବି ସେ ସ୍କୁଲ ପିଲାମାନଙ୍କୁ ନିଜ ପିଲା ଭାବେ ଦେଖୁଛନ୍ତି। ସ୍କୁଲର ପ୍ରାୟ ୩୦୦ ପିଲାଙ୍କୁ ପ୍ରତିଦିନ ଖାଇବାକୁ ଦେଇ ସେ ବେଶ୍ ଖୁସି ଅନୁଭବ କରୁଛନ୍ତି।