ସୁନା ମୂଲ୍ୟ ଅମୂଲମୂଲ। ଯେଉଁ ଜିନିଷକୁ ସୁନା ସହ ତୁଳନା କରାଯାଏ ତାହାର ମୂଲ୍ୟ ବି ଅଧିକ। ଏମିତି ଏକ କଳାସୁନା ବା ଜିଆଖତ ତିଆରି କରିଛନ୍ତି ଉତ୍ତରପ୍ରଦେଶର ସନା ଖାନ୍। ସେ ଏସ୍.ଜେ. ଅର୍ଗାନିକ୍ସ ପ୍ରତିଷ୍ଠା କରି ସେଠାରେ ଏହା ତିଆରି କରୁଛନ୍ତି । ସବୁଠୁ ବଡ଼ କଥା ହେଉଛି, ସେ ବର୍ଜ୍ୟରୁ ହିଁ ଏହି ଖତ ତିଆରି କରୁଛନ୍ତି। ସନା ରହନ୍ତି ମେରଟରେ। ସେ ଡାକ୍ତର ହେବାକୁ ଲକ୍ଷ୍ୟ ରଖିଥିଲେ। କିନ୍ତୁ ସେଥିରେ ବିଫଳ ହେବା ପରେ ଜିଆଖତ ପ୍ରସ୍ତୁତ କରିବାକୁ ନିଷ୍ପତ୍ତି ନେଇଥିଲେ ଓ ୨୦୧୪ରେ ତାଙ୍କ ଭାଇଙ୍କଠାରୁ ଆର୍ଥିକ ସହଯୋଗରେ ଏସ୍.ଜେ. ଅର୍ଗାନିକ୍ସ ଆରମ୍ଭ କରିଥିଲେ। ସେ ଖତ ତିଆରି କରିବା ପରେ ତାହାକୁ ପରୀକ୍ଷା କରାଉଛନ୍ତି। ୨୦୨୦ରେ କମ୍ପାନୀ ୫୦୦ ଟନ୍ ବର୍ଜ୍ୟ ସଂଗ୍ରହ କରି ସେଥିରୁ ୧୫୦ ଟନ୍ ଖତ ତିଆରି କରିଥିଲେ। ଏବେ ଏହି କାର୍ଯ୍ୟରେ ସେ ୩୦ ଜଣଙ୍କୁ ନିଯୁକ୍ତି ଦେଇଛନ୍ତି। କଳାସୁନା ପ୍ରସ୍ତୁତ କରି ସନା ବର୍ଷକୁ ୧ କୋଟି ଟଙ୍କା ରୋଜଗାର କରୁଛନ୍ତି। ସେ ମଧ୍ୟ ମେରଟ୍ର ୧୦୦ ସ୍କୁଲରେ ଜିଆଖତ ତିଆରି କେନ୍ଦ୍ର ଖୋଲିଛନ୍ତି ଓ ସେଠାକାର ବର୍ଜ୍ୟକୁ ଖତରେ ପରିଣତ କରୁଛନ୍ତି। ଏହା ବ୍ୟତୀତ ସେ ଅନ୍ୟ ବ୍ୟବସାୟୀଙ୍କୁ ଏ ବାବଦରେ ପ୍ରଶିକ୍ଷଣ ଦେଉଛନ୍ତି।