ପ୍ଲାଷ୍ଟିକ୍ ବୋତଲରେ ଘର ନିର୍ମାଣ କରି ପରିବେଶ ପ୍ରଦୂଷଣ ରୋକିବାରେ ଅଭିନବ ଉପାୟ ଆପଣାଇଛନ୍ତି ଓରଙ୍ଗାବାଦ୍ର ନମିତା କାପାଡେ ଏବଂ କଲ୍ୟାଣୀ ଭାରମ୍ବେ। ଘରକାନ୍ଥ ନିର୍ମାଣ କରିବାରେ ୧୬,୦୦୦ ପ୍ଲାଷ୍ଟିକ୍ ବୋତଲ ବ୍ୟବହାର କରାଯାଇଛି। ନମିତା ଆର୍ଟ ଆଣ୍ଡ୍ ଡିଜାଇନ ଓ କଲ୍ୟାଣୀ ଫାଇନ୍ ଆର୍ଟରେ ଡିଗ୍ରୀ ହାସଲ କରିଛନ୍ତି। ବୋତଲରେ ମାଟି ଭର୍ତ୍ତିକରି ପ୍ଲାଷ୍ଟିକ୍ ଇଟା ନିର୍ମାଣ କରାଯାଇଛି। ଓରଙ୍ଗାବାଦ୍ର ସରକାରୀ ଇଞ୍ଜିନିୟରିଂ କଲେଜରେ ସେ ଇଟା ପରୀକ୍ଷା କରାଯିବା ପରେ ଏହି ଘରେ ବ୍ୟବହାର କରାଯାଇଛି। ଏହିସବୁ ବୋତଲ ସେମାନେ ଓରଙ୍ଗାବାଦ୍ର ବର୍ଜ୍ୟ ସଂଗ୍ରହକାରୀ, ହୋଟେଲ ଏବଂ ଗ୍ରୋସେରି ଦୋକାନରୁ ସଂଗ୍ରହ କରୁଛନ୍ତି। ବର୍ଜ୍ୟ ସଂଗ୍ରହ କରୁଥିବାରୁ ନମିତାଙ୍କୁ ଲୋକେ ପ୍ରଥମେ ବୋତଲବାଲି କିମ୍ବା ପ୍ଲାଷ୍ଟିକ୍ବାଲି ଡାକୁଥିଲେ। ହେଲେ ସେ ଏହାକୁ ଖାତିର ନ କରି ଏବେ ଯେଉଁ ଘର ନିର୍ମାଣ କରିଛନ୍ତି ତାହାକୁ ଅନ୍ୟମାନେ ପ୍ରଶଂସା କରୁଛନ୍ତି। ସେ ପ୍ଲାଷ୍ଟିକ୍ ବୋତଲରେ ନିର୍ମିତ ଇଟାକୁ ଉପରକୁ ଉପର ରଖି ସେଗୁଡ଼ିକୁ ଗୋବର ଓ ମାଟିରେ ଯୋଡ଼େଇ କରୁଛନ୍ତି। ଘରର ଛାତ ବାଉଁଶ ଓ କାଠରେ କରାଯାଇଛି। ଘରଟି ୧୦ ମାସରେ ସମ୍ପୂର୍ଣ୍ଣ ହୋଇଛି। ଏହି ଘର ଲାଗି ଖର୍ଚ୍ଚ ହୋଇଛି ୭ ଲକ୍ଷ ଟଙ୍କା । ଏହି ଦୁଇ ବାନ୍ଧବୀ ଅଧିକ ଘର ନିର୍ମାଣ କରିବା ଯୋଜନା କରିଛନ୍ତି। ନମିତା କହନ୍ତି, ଏହି ଘରେ ଖରାଦିନେ ଏୟାରକଣ୍ଡିଶନର ଆବଶ୍ୟକ ହେବନାହିଁ।