ମାତ୍ର ୧୦ ବର୍ଷ ବୟସରେ ବ୍ୟବସାୟୀ ଭାବେ ନିଜକୁ ପ୍ରତିଷ୍ଠିତ କରିପାରିଛନ୍ତି ଭଦୋଦରାର ରେନାଶ ଦେଶାଇ। ରେନାଶ ‘ଏନସୋ ସୁଜ୍ ଷ୍ଟାର୍ଟଅପ’ ଗଠନ କରି ତା’ ମାଧ୍ୟମରେ ଷ୍ଟାଇଲିଶ ଜୋତା ତିଆରି କରି ବିକ୍ରି କରୁଛନ୍ତି। ବଡ଼କଥା ହେଉଛି ସେ ତାଙ୍କ ବିଜ୍ନେସରୁ ଯାହା ରୋଜଗାର କରୁଛନ୍ତି ତାହାର ୪୦% ଅସହାୟ ଲୋକଙ୍କୁ ଦାନ କରୁଛନ୍ତି। ଥରେ ଏକ ଷ୍ଟାଇଲିଶ ଜୋତା ଦେଖି ତାହାକୁ କିଣିବା ଲାଗି ଇଣ୍ଟର୍ନେଟରେ ଖୋଜିବା ପରେ ତାହା ପାଇ ନ ଥିଲେ। ପରେ ସେଭଳି ଜୋତା କେମିତି ତିଆରି କରାଯାଉଛି ତାହା ଜାଣିବା ଲାଗି ୟୁଟ୍ୟୁବରୁ ଶିକ୍ଷା କରି ନିଜ ପାଇଁ ଏକ ଭଲ ଜୋତା ତିଆରିି କରିପାରିଲେ। ପ୍ରଥମ ଜୋତା ତିଆରି କରିବା ପରେ ତାହା ତାଙ୍କ ସମ୍ପର୍କୀୟ ତଥା ପରିବାର ଲୋକଙ୍କୁ ପସନ୍ଦ ହୋଇଥିଲା ଓ ସେମାନେ ଏଭଳି ଜୋତା ସେମାନଙ୍କ ପାଇଁ ତିଆରି କରିବାକୁ ଅର୍ଡର ଦେଇଥିଲେ। ପରେ ଅଧିକ ତିଆରି କରି ଭଦୋଦରାର ଏକ ବିଜ୍ନେସ ମେଳାକୁ ଗଲେ ରେନାଶ। ଫଳରେ ତାଙ୍କ ନିକଟକୁ ଅଧିକରୁ ଅଧିକ ଅର୍ଡର ଆସିବାକୁ ଲାଗିଲା। ପରେ ରେନାଶଙ୍କ ବଡ଼ଭାଇ ତାଙ୍କୁ ଜୋତା ତିଆରିରେ ସହଯୋଗ କରୁଛନ୍ତି। ସେମାନେ ପଢ଼ା ଭିତରୁ ସମୟ ବାହାର କରି ଏବେ ସୁଦ୍ଧା ଦୁଇଭାଇ ୫୦ଟି ଅର୍ଡର ଅନୁଯାୟୀ ଜୋତା ବିକ୍ରି କରିସାରିଲେଣି। ତାଙ୍କ ଜୋତାର ମୂଲ୍ୟ ୨,୧୦୦ ଟଙ୍କାରୁ ଆରମ୍ଭ ହୋଇଛି।