ପରିବେଶ ସୁରକ୍ଷା ସହ ଟ୍ରାଫିକ୍ ସମସ୍ୟା ସମାଧାନର ଲକ୍ଷ୍ୟ ନେଇ କଳ୍ପିତ ପାଟିଲ ଆବିଷ୍କାର କରିଥିବା ଛୋଟ ବିଦ୍ୟୁତ୍ଚାଳିତ ଯାନ(ଇଭି) ପରିବହନ କ୍ଷେତ୍ରରେ ଏକ ନୂଆ ଅଧ୍ୟାୟ ଯୋଡ଼ିବାକୁ ଯାଉଛି। କଳ୍ପିତଙ୍କ ବୟସ ୩୫, ରହୁଛନ୍ତି ମୁମ୍ବାଇରେ। ସେ ଇଞ୍ଜିନିୟରିଂ ପରେ ଏମ୍ବିଏ କରି ଭଲ ଚାକିରି କରିଥିଲେ। ପରେ ୨୦୧୫ରେ ଚାକିରି ଛାଡ଼ି ଏହି କାର୍ ନିର୍ମାଣ କରିବା ଲାଗି ପ୍ରଥମେ କାର୍ଯ୍ୟ ଆରମ୍ଭ କରିଥିଲେ। ବହୁ ପରୀକ୍ଷା ନିରୀକ୍ଷା ପରେ ସେ ଇଏଏସ୍୍-ଇ ମାଇକ୍ରୋ କାର୍ ନିର୍ମାଣ କରିଛନ୍ତି। ଏହା ଭାରତର ପ୍ରଥମ ମାଇକ୍ରୋ ଇଲେକ୍ଟ୍ରି କାର୍। ଏହାର ଚଉଡ଼ା ୧୦୦୦ମି.ମି.(୩.୨୮ଫୁଟ)। ଏହାକୁ ରାସ୍ତାକଡ଼ରେ କମ୍ ଜାଗାରେ ରଖାଯାଇପାରୁଛି। ଏଥିରେ ବହୁ କମ୍ ଶକ୍ତି ଉପଯୋଗ ହେବା ସହ ଓ କାର୍ବନ ନିର୍ଗମନ ଶୂନ ।
୪ ଘଣ୍ଟାରେ ଏହା ସମ୍ପୂର୍ଣ୍ଣ ଚାର୍ଜ ହୋଇଯାଉଛି ଓ ଥରେ ଚାର୍ଜ ହେଲେ ୧୫୦ କି.ମି. ଯାଇପାରୁଛି। ଏଥିରେ ୨ଜଣ ବସିପାରୁଛନ୍ତି। ଏବକାର ଇଲେକ୍ଟ୍ରିକ୍ କାର୍ରେ ୧୦୦-୧୨୦ ଓ୍ବାଟ୍ ଶକ୍ତି ଲାଗୁଥିବାବେଳେ କଳ୍ପିତଙ୍କ ଦ୍ୱାରା ନିର୍ମିତ ମାଇକ୍ରୋ କାର୍ରେ ୫୦-୭୦ଓ୍ବାଟ୍ ଦରକାର ପଡ଼ୁଛି। ଏବେ ମୁମ୍ବାଇ, ଦିଲ୍ଲୀ, ପୁଣେ ଏବଂ ବେଙ୍ଗାଲୁରୁରୁ ଉକ୍ତ ମାଇକ୍ରୋ ଇଲେକ୍ଟ୍ରିକ କାର୍ ଲାଗି ୭୦୦୦ ଅର୍ଡର ମିଳିସାରିଲାଣି।