ବୟସ ୯୨, କିନ୍ତୁ ଏବେ ବି ଚଳଚଞ୍ଚଳ ମୁମ୍ବାଇର ନବୀନ ଚନ୍ଦ୍ରା। ସେ ତାଙ୍କ ହାଉସିଂ ସୋସାଇଟିରୁ ଜଳ ଓ ଶକ୍ତି ସଙ୍କଟ ଟାଳିବାରେ ସଫଳ ହୋଇଛନ୍ତି। ନୂତନତ୍ୱ ଓ ପରିବେଶ ଉପଯୋଗୀ ପଦ୍ଧତିରେ ସେ ଏହି କାର୍ଯ୍ୟ କରି ୨ ଲକ୍ଷ ଲିଟର ପାଣି ବଞ୍ଚାଇବା ସହ ବିଦ୍ୟୁତ୍ ବିଲ୍ ଅଧାକୁ କମାଇ ପାରିଛନ୍ତି। ମୁମ୍ବାଇରେ ପ୍ରାୟ ସମସ୍ତ ହାଉସିଂ ସୋସାଇଟି ଜଳ ଓ ବିଦ୍ୟୁତ୍ ସଙ୍କଟର ସାମ୍ନା କରୁଥିବା ବେଳେ ନବୀନ ତାଙ୍କ ସୋସାଇଟିକୁ ଏଥିରୁ ମୁକ୍ତ କରି ଅନ୍ୟମାନଙ୍କୁ ବାଟ ଦେଖାଇଛନ୍ତି। ନବୀନ ରହୁଥିବା ସିଲାଇନ ହାଉସିଂ ସୋସାଇଟିର ଅଧ୍ୟକ୍ଷ ଅଛନ୍ତି। ସୋସାଇଟିର ଲୋକେ ଓ୍ବାଟର ଟ୍ୟାଙ୍କର କିଣିବା ଦେଖିବା ପରେ ଏହାର ସମାଧାନ କରିବା ଲାଗି ସେ ନିଷ୍ପତ୍ତି ନେଇଥିଲେ। ପରେ ବର୍ଷାଜଳ ସଂରକ୍ଷଣ କରିବା ପାଇଁ ସେ ଲୋକମାନଙ୍କୁ ପ୍ରେରିତ କରିବା ସହ ସୋଲାର ପ୍ୟାନେଲ ଲଗାଇବା ବ୍ୟବସ୍ଥା କରିଥିଲେ। ଏହି କାର୍ଯ୍ୟ ସେ ୨୦୧୨ରେ ଆରମ୍ଭ କରିଥିଲେ। କେବଳ ଏତିକି ନୁହେଁ, ବର୍ଜ୍ୟରୁ ଖତ ପ୍ରସ୍ତୁତ କରିବାରେ ବି ନବୀନ ପ୍ରମୁଖ ଭୂମିକା ନେଉଛନ୍ତି। ତାଙ୍କ ସୋସାଇଟିର ଅନ୍ୟ ସଦସ୍ୟମାନଙ୍କ ସହ ବୃକ୍ଷରୋପଣ ବି କରୁଛନ୍ତି।