ମହାରାଷ୍ଟ୍ର ନାସିକ ଜିଲା କୋର୍ଟର ଏକ ନିଆରା ନିଷ୍ପତ୍ତି ଏବେ ଚର୍ଚ୍ଚାର ବିଷୟ ପାଲଟିଛି। ଆକ୍ରମଣ ପାଇଁ ଜଣେ ବ୍ୟକ୍ତିଙ୍କୁ ଜେଲକୁ ପଠାଇବା ପରିବର୍ତ୍ତେ କୋର୍ଟ ଏକ ନିଆରା ଦଣ୍ଡାଦେଶ କରିଛନ୍ତି , ଯାହା ଶୁଣି ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି। ଆକ୍ରମଣରେ ଦୋଷୀ ସାବ୍ୟସ୍ତ ହୋଇଥିବା ଯୁବକ ରଉଫ ଖାନ୍ଙ୍କୁ ୨୧ ଦିନ ପାଇଁ ପ୍ରତିଦିନ ଦୁଇଟି ଗଛ ଲଗାଇବା ଏବଂ ଦିନକୁ ପାଞ୍ଚଥର ନମାଜ ପାଠ କରିବା ପାଇଁ କୋର୍ଟ ନିର୍ଦ୍ଦେଶ ଦେଇଛନ୍ତି। ୨୦୧୦ରେ ଏକ ସଡ଼କ ଦୁର୍ଘଟଣା ପରେ ଜଣେ ବ୍ୟକ୍ତିଙ୍କୁ ଆକ୍ରମଣ କରି ଗୁରୁତର ଆହତ କରିଥିବା ଅଭିଯୋଗରେ ୩୦ ବର୍ଷୀୟ ରଉଫଙ୍କ ବିରୋଧରେ ଅଭିଯୋଗ ହୋଇଥିଲା। ଦୀର୍ଘଦିନ ବିଚାର ପରେ ଏହି ମାମଲାରେ କୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରି ମାଜିଷ୍ଟ୍ରେଟ ତେଜୱନ୍ତ ସିଂ ସାନ୍ଧୁ ଫେବୃୟାରୀ ୨୭ରେ ଦଣ୍ଡାଦେଶ ଶୁଣାଇଥିଲେ। ଏଣୁ ଫେବୟାରୀ ୨୮ରୁ ୨୧ ଦିନ ପାଇଁ ଦିନକୁ ପାଞ୍ଚଥର ନମାଜ ପାଠ କରିବା ସହ ସୋନାପୁରା ମସଜିଦ ପରିସରରେ ଦୁଇଟି ଗଛ ଲଗାଇବା ଆରମ୍ଭ କରିଛନ୍ତି। କେବଳ ଏତିକି ନୁହେଁ ସେ ଯେଉଁ ଗଛ ଲଗାଇବେ ତାହା ଯନତ୍ ମଧ୍ୟ ନେବା ଲାଗି କୋର୍ଟ ନିର୍ଦ୍ଦେଶ ଦେଇଛନ୍ତି। କୋର୍ଟ ଆଇପିସିର ଧାରା ୩୨୩ ଅନୁଯାୟୀ ଖାନ୍ଙ୍କୁ ଦୋଷୀ ସାବ୍ୟସ୍ତ କରିଥିଲେ ଏବଂ ତାଙ୍କୁ ଅନ୍ୟ ଦୋଷରୁ ମୁକ୍ତ କରିଥିଲେ। କୋର୍ଟ କହିଛନ୍ତି ଯେ ଦୋଷୀ ସାବ୍ୟସ୍ତ ହୋଇଥିବା ବ୍ୟକ୍ତି ଯେପରି ଏହାର ପୁନରାବୃତ୍ତି ନ କରନ୍ତି ତାହା ଗୁରୁତ୍ୱପୂର୍ଣ୍ଣ।