ସହରରେ ଖେଳପଡ଼ିଆ ଅଭାବ ସମସ୍ୟା ଦୂର କରିବା ଲାଗି ନଭି ମୁମ୍ବାଇ ମ୍ୟୁନିସିପାଲ କର୍ପୋରେଶନ(ଏନ୍ଏମ୍ଏମ୍ସି)ର ପଦକ୍ଷେପ ଅନ୍ୟମାନଙ୍କ ପାଇଁ ଏକ ମଡେଲ ପାଲଟିଛି। ନଭି ମୁମ୍ବାଇର ସେକ୍ଟର ୧୫ ସ୍ଥିତ ସନ୍ପଦ ଫ୍ଲାଏଓଭର ତଳେ ଥିବା ଅବ୍ୟବହୃତ ଜାଗାକୁ ଖେଳପଡ଼ିଆ କରାଯାଇଛି। ପାଖାପାଖି ୨୭୫୦ ବର୍ଗମିଟର ଜାଗାରେ କରାଯାଇଥିବା ଉକ୍ତ ଖେଳପଡ଼ିଆରେ ପିଲାଏ କ୍ରିକେଟ, ବାସ୍କେଟବଲ ଓ ବ୍ୟାଡମିଣ୍ଟନ ଖେଳିପାରୁଛନ୍ତି। ବଲ୍ କିମ୍ବା ରାକେଟ୍ ବାହାରକୁ ନ ଯିବା ଲାଗି ପଡ଼ିଆ ଚାରିପାଖକୁ ନେଟ୍ ଯୋଗେ ଘେରାଯାଇଛି। ଏହା ବାଦ୍ ଫ୍ଲାଏଓଭର ତଳେ ଓପନ ଜିମ୍ କରାଯିବାର ଯୋଜନା ସହ ଯୋଗାଭ୍ୟାସର ସୁବିଧା ରହିଛି। ବରିଷ୍ଠ ନାଗରିକଙ୍କ ପାଇଁ ଜଗିଂ ଟ୍ରାକ୍ ମଧ୍ୟ କରାଯାଇଛି। ଏନ୍ଏମ୍ଏମ୍ସି ସନପଦ୍ ବ୍ୟତୀତ ନେରୁଲ ଫ୍ଲାଏଓଭର ତଳେ ବି ସମାନ ପ୍ରକାର ଖେଳପଡ଼ିଆ କରିବା ଲାଗି ଯୋଜନା ରଖିଛି। ଗୋଟିଏ ପଟରେ ଜବରଦଖଲ ହଟୁଛି ଓ ଅନ୍ୟପକ୍ଷେ ପିଲାଙ୍କ ଖେଳ ଲାଗି ବ୍ୟବସ୍ଥା କରାଯିବାରେ ଏନ୍ଏମ୍ଏମ୍ସିର ଉଦ୍ୟମକୁ ସବୁସ୍ତରରେ ପ୍ରଶଂସା କରାଯାଉଛି। ଏଭଳି ଏକ ନିଆରା ପ୍ରୟାସର ଭିଡିଓ ମଧ୍ୟ ଭାଇରାଲ ହେବା ସହ ଏହାର ପ୍ରଭାବ ବି ଦେଖିବାକୁ ମିଳିଛି। କମେଣ୍ଟରେ ଦେଶର କେତେକ ମ୍ୟୁନିସିପାଲିଟିର ଅଧିକାରୀମାନେ ଏଭଳି ଯୋଜନା ଆପଣାଇବା ଲାଗି ଆଗ୍ରହ ପ୍ରକାଶ କରିଛନ୍ତି।