ସେବାର ମୂଲ୍ୟ ବୁଝିଥିବା ଜଣେ ଡାକ୍ତର ଓ ତାଙ୍କ ସ୍ତ୍ରୀ ଉତ୍ତରପୂର୍ବାଞ୍ଚଳର ଗ୍ରାମୀଣ ଅଞ୍ଚଳରେ ସୁବିଧାରେ ସ୍ବାସ୍ଥ୍ୟସେବା ଯୋଗାଇ ଦେଉଛନ୍ତି। ଏହି ଦମ୍ପତି ହେଉଛନ୍ତି ସେନାର ପୂର୍ବତନ ଡାକ୍ତର ସୁନୀଲ କୌଲ ଏବଂ ଜେନିଫର୍ ଲିଆଙ୍ଗ। ସେମାନେ ମୁଖ୍ୟତଃ ମାନସିକ ରୋଗୀମାନଙ୍କୁ ଶସ୍ତାରେ ଚିକିତ୍ସା ଯୋଗାଇ ଦେଉଛନ୍ତି। ପ୍ରଥମେ ଉକ୍ତ ଦମ୍ପତି ୨୦୦୦ରେ ଗାନ୍ଧିବାଦୀ ସ୍ବର୍ଗତ ରବୀନ୍ଦ୍ରନାଥ ଉପାଧ୍ୟାୟଙ୍କ ସହଯୋଗରେ ଉତ୍ତରପୂର୍ବାଞ୍ଚଳର ଦୁର୍ଗମ ଗାଁରେ ସେବା ଆରମ୍ଭ କରିଥିଲେ। ଏବେ ଆସାମର ୧୩ ଜିଲାର ୨୦ଟି ସ୍ଥାନରେ ଚିକିତ୍ସା ଯୋଗାଇ ଦେଉଛନ୍ତି। ଏହା ବ୍ୟତୀତ ମେଘାଳୟ ଓ ପଶ୍ଚିମବଙ୍ଗର ରୋଗୀମାନେ ବି ଚିକିତ୍ସା ସୁବିଧା ପାଉଛନ୍ତି। ଏଥିପାଇଁ ସେ ମେଣ୍ଟାଲ ଇଲ୍ନେସ ଟ୍ରିଟ୍ମେଣ୍ଟ ଆଲିଆନ୍ସ(ଏମ୍ଆଇଟିଏ) ଏନ୍ଜିଓ ଗଠନ କରିଛନ୍ତି। ଏହି ଅଭିଯାନରେ ଅନେକ ଡାକ୍ତର ବି ଯୋଡ଼ି ହୋଇଛନ୍ତି। ଏବେ ୪,୦୦୦ ଲୋକ ସେମାନଙ୍କ ଚିକିତ୍ସାରୁ ଉପକୃତ ହେଉଛନ୍ତି, ଯେଉଁମାନେ ଚିକିତ୍ସା, ଓଷଧ ବାବଦରେ ମାତ୍ର ମାସକୁ ୩୦୦ଟଙ୍କା ଦେଉଛନ୍ତି। ଏମାନଙ୍କୁ ଛାଡ଼ିଦେଲେ ବହୁ ଲୋକଙ୍କୁ ମାଗଣାରେ ଚିକିତ୍ସା ଓ ଓଷଧ ଯୋଗାଇ ଦିଆଯାଉଛି।
