୨୦ ବର୍ଷ ଧରି ଜଣେ ଛାତ୍ର ଏମ୍ବିବିଏସ୍ ପଢୁଛନ୍ତି, ହେଲେ ପାସ୍ କରିପାରିନାହାନ୍ତି। ନା ଡାକ୍ତର ହେଉଛନ୍ତି ଅବା ସିଟ୍ ଖାଲି ହେଉଛି। ବାସ୍ତବରେ ଏମିତି ଏକ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶ କାନପୁରରେ। ଶାହାଜାହାନପୁରର ବାସିନ୍ଦା ଜିତେନ୍ଦ୍ର ସିଂ ୨୦୦୩ରେ କାନପୁରର ଜିଏସ୍ଭିଏମ୍ ମେଡିକାଲ କଲେଜରେ ନାମ ଲେଖାଇଥିଲେ। ବେଳେବେଳେ ସେ ପରୀକ୍ଷା ଦେଉଛନ୍ତି ତ ପୁଣି ତିନି-ଚାରି ବର୍ଷ ପାଇଁ ନିଖୋଜ ହୋଇଯାଉଛନ୍ତି। ସେଥିପାଇଁ ମେଡିକାଲ କଲେଜର ଗୋଟିଏ ସିଟ୍ ତାଙ୍କ ଯୋଗୁ ଗତ ୨୦ ବର୍ଷ ଧରି ଖାଲି ହୋଇପାରୁନାହିଁ। ଜିତେନ୍ଦ୍ରଙ୍କ ଏହି ଅଜବ ମାମଲାର ଚୂଡ଼ାନ୍ତ ନିଷ୍ପତ୍ତି ପାଇଁ ଡିଜିଏମ୍ଇ(ଡାଇରେକ୍ଟର ଜେନେରାଲ ମେଡିକାଲ ଏଜୁକେଶନ)କୁ ପଠାଯାଇଛି। ଜିତେନ୍ଦ୍ର ୨୦୦୩ରେ ନାମ ଲେଖାଇବାର କିଛିଦିନ ପରେ କାହାକୁ କିଛି ନ ଜଣାଇ କେଉଁଆଡ଼େ ଚାଲିଗଲେ। ଚାରିବର୍ଷ ପରେ ସେ ୨୦୦୭ରେ ଫେରି ନୂତନ ବ୍ୟାଚ୍ ଛାତ୍ରମାନଙ୍କ ସହ ମିଶି ଅଧ୍ୟୟନ କଲେ। ଦୁଇ ବର୍ଷ ଅଧ୍ୟୟନ କରିବା ପରେ ପୁଣି ହଠାତ୍ ୨୦୦୯ରେ କୁଆଡ଼େ ଚାଲିଗଲେ। ଫେରିଲେ ୨୦୧୪ରେ ଏବଂ ଦୁଇଟି ଇଣ୍ଟରନାଲ ଟର୍ମ ପରୀକ୍ଷା ଦେବା ପରେ ପୁଣି ନିଖୋଜ ହୋଇଗଲେ। ପୁନର୍ବାର ୨୦୧୭ରେ ଫେରି ଜିତେନ୍ଦ୍ର ତୃତୀୟ ଟର୍ମ ପରୀକ୍ଷା ଦେଲେ ଓ ପାସ୍ କଲେ। ୨୦୧୮ରେ ଏମ୍ବିବିଏସ୍ର ଚତୁର୍ଥ ବର୍ଷରେ ଦୁଇଟି ଟର୍ମ ପରୀକ୍ଷା ଦେଇଥିଲେ ବି ଜିତେନ୍ଦ୍ର ଏଯାବତ୍ ପାସ୍ କରିପାରି ନାହାନ୍ତି।